Ońtústik Qazaqstanǵa ınvestısııa tartý maqsatynda uıymdastyrylǵan Qazaq-Túrik ınvestısııalyq forýmynda sóz alǵan óńir basshysy Joldaýda júktegen mindetterdi júzege asyrý maqsatynda bıznes ókilderimen birlesip, oblystyń «Biryńǵaı eksport strategııasy» ázirlenip jatqanyn atap ótti. Sondaı-aq, ol taýar óndirý men ótkizý, qyzmet kórsetý isin jahandyq jelige beıimdeý qajettigine toqtaldy, dep habarlady OQO ákiminiń baspasóz qyzmeti.
«Bul tusta Qazaqstan men Túrkııa memleketiniń arasyndaǵy qarym-qatynasty atap ótkim kelip otyr. Búginde Ankara Astananyń saıası jáne ekonomıkalyq turǵydaǵy eń jaqyn jáne senimdi seriktesine aınaldy. Túrkııa qazirgi tańda ekonomıkalyq kórsetkishteri boıynsha álemdegi damyǵan jıyrma eldiń qatarynda. Ásirese sońǵy jyldary qurylys, aýyl sharýashylyq ónimderin óńdeý, farmasevtıka, medısına salalarynda asa belsendilik tanytyp, Qazaqstanda jáne Ońtústik Qazaqstan oblysyna da óziniń damý úrdisin usynyp keledi»,-dedi ákim.
Aıta keteıik, Túrkııa eli qazirgi tańda ekonomıkalyq kórsetkishteri boıynsha álemdegi damyǵan 20 eldiń qatarynda. Túrkııa uıymdasqan ındýstrııalyq aımaq qurý boıynsha baı jáne sátti tájirıbe jınaǵan respýblıka. Búginde Ońtústiktegi túrkııalyq fırmalar men kompanııalardyń sany 30-ǵa jetip otyr. Bul eki el arasyndaǵy saýda-ekonomıkalyq qarym-qatynastyń joǵary dárejede damyp otyrǵanyn kórsetedi.
Ońtústik Qazaqstan oblysy 3 mıllıon halqy bar, myqty ekonomıkalyq áleýeti zor, serpindi damyp kele jatqan óńir. Sonymen qosa, oblys Azııa men Taıaý Shyǵysty jáne Eýropany baılanystyryp turǵan «Batys-Eýropa, Batys-Qytaı» avtomagıstraliniń mańynda ornalasqan. Sondyqtan ońtústik óńiri eksport baǵdarlaýshy óndiris pen shekaralyq saýdanyń damýyn qamtamasyz etýge kúsh salady.
Forýmda aımaq basshysy oblystyń damý jetistikterine toqtalyp, túrik kásipkerlerin aldaǵy ýaqytta birlesip jumys isteýge shaqyrdy.
Jıynda sondaı-aq, Túrik Keńesi Bas hatshysynyń orynbasary Omer Kodjaman, QR Investısııalar jáne damý mınıstrliginiń ınvestısııalar Komıtetiniń Tóraǵasy Saparbek Tuıaqbaev, Túrkııa Respýblıkasy Ulttyq ekonomıka mınıstriniń keńesshisi Taryk Sonmez, Túrkııadaǵy «OSTIM» ındýstrıaldy aımaqtardy basqarý jáne qurý halyqaralyq operatorynyń basqarma tóraǵasy Orhan Aıdyn, Túrkııanyń Sakarııa qalasyndaǵy saýda-ónerkásip palatasynyń basqarma tóraǵasy Mahmýt Kosemýsýl baıandama jasady.
Investısııalyq forým barysynda eki jaqty yntymaqtastyqty arttyrý maqsatynda memorandým túzildi.