Qurlyqtyq hokkeı lıgasynyń turaqty chempıonatynda Astananyń «Barysy» óz aıdynynda Helsınkıdiń «Iokerıt» komandasyn qabyldap, 0:2 esebimen ese jiberdi.
Osydan birer apta buryn Helsınkıde 4:3 esebimen utqan Edýard Zankoves shákirtteri bul joly sol jetistikterin qaıtalaı almady.
Alǵashqy eki kezeńde qos komanda birin-biri ańdysyp, birqatar qaýipti shabýyl uıymdastyrǵanmen, esep ashylmady. Bárin jospar boıynsha júzege asyryp kelgen elordalyqtar sońǵy 20 mınýtta eki birdeı shaıba jiberip aldy. Aldymen, 41-mınýtta Pekka Iormakka birinshi shaıbany salsa, araǵa on mınýt salyp, Mıka Nıemı «Iokerıttiń» sońǵy goldy soqty.
Osymen 55 oıynnan keıin 81 upaı jınaǵan «Barys» «Shyǵys» konferensııasynda ázirge 6-orynda keledi. Kelesi kezdesýin 3 aqpan kúni Mınskiniń «Dınamosyna» qarsy ótkizedi.
«Menińshe, bul oıyn teń dárejede ótti. Ekinshi kezeńde oıynshy artyqtyǵyna ıe bolǵandyqtan, azdap basym boldyq. О́kinishke oraı, alǵash bolyp shaıba jiberip alǵandyqtan, abdyrap qaldyq. Kim birinshi bolyp esepte alǵa shyqsa, psıhologııalyq turǵydan basym bolatyny belgili jaıt. Olar bizge qaraǵanda múmkindikterin tıimdi paıdalana bildi», – dedi «Barys» jattyqtyrýshysy Edýard Zankoves.