Tatýlyqtyń tiregine, yntymaqtastyqtyń uıytqysyna aınalǵan Qazaqstan halqy Assambleıasy alǵashqylardyń biri bolyp Joldaýǵa baılanysty únqosý úshin respýblıkadaǵy etnomádenı birlestikterdiń jetekshileri, Qazaqstan halqy Assambleıasy Keńesiniń músheleri Almatydaǵy Dostyq úıinde bas qosty.
Is-sharaǵa Qazaqstan halqy Assambleıasy Tóraǵasynyń orynbasary – Hatshylyq meńgerýshisi Eraly Toǵjanov, QHA Tóraǵasynyń orynbasary L.Pıtalenko, QHA Keńesiniń músheleri, etnomádenı birlestikterdiń belsendileri, jastar uıymdary, QHA Ǵylymı-saraptamalyq keńesi men zııalyq qaýym ókilderi, QHA-nyń ózge de qurylymdarynyń basshylary qatysty. Jıyn barysynda N.Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Qazaqstan halqyna Joldaýy, sondaı-aq, Memleket basshysynyń konstıtýsııalyq reformasyna baılanysty usynystardy ázirleý máseleleri talqylandy.
Memleket basshysynyń elimizdiń jahandyq básekege qabilettiligin qamtamasyz etýdi, ekonomıkalyq ósimniń jańa modelin qurýdy maqsat etken bıylǵy Joldaýyna oraı arnaıy baıandama jasaǵan Eraly Toǵjanov birneshe negizgi baǵyttardy atap ótip, olardyń mazmunyna toqtaldy. Birinshiden, Prezıdenttiń Joldaýy Qazaqstannyń árbir azamatynyń ómir sapasyn arttyrýǵa arnalǵan. Ekinshiden, Qazaqstannyń úshinshi jańǵyrýy Memleket basshysynyń saıası-konstıtýsııalyq reformasynyń qısyndy jalǵasy retinde eldi demokratııalandyrý úshin berik ekonomıkalyq jáne áleýmettik negiz quraıdy. Memlekettiń, qoǵamnyń, Qazaqstan halqynyń jahandyq tarıhı aýqymda ekonomıkalyq jáne saıası damýyn retteıdi.
Úshinshiden, bul Joldaý – qazaqstandyq biregeılik pen birliktiń, qoǵamdyq kelisim men turaqtylyqtyń ekonomıkalyq, áleýmettik nyǵaıýy men damýynyń algorıtmi nemese tıimdi joly. Eraly Toǵjanov Prezıdent aıqyndap bergen Úshinshi jańǵyrýdyń negizgi bes basymdyǵyna toqtaldy. Olar: ekonomıkalyq jedeldetilgen tehnologııalyq jańǵyrý, dástúrli bazalyq salalardy damytýǵa serpin berý, eńbek naryǵyn jańǵyrtý, makroekonomıkalyq turaqtylyq, adamı kapıtal sapasyn jaqsartý, ınstıtýttyq ózgerister, qaýipsizdik jáne sybaılas jemqorlyqpen kúres.
Negizinen, bul Joldaýdy – Uly Dala eliniń ekonomıkalyq, áleýmettik, tehnologııalyq jáne ǵylymı damýynyń strategııalyq jospary deýge bolady. Nátıjeli reforma jasaý belgili merzimge nemese jarııalaý ýaqytyna baılanysty. Erte jarııalansa, qoǵamnyń túsinýi qıyn, kesh jarııalansa, memleket damýyn tejeıdi. Elbasynyń saıası kóregendigi – osy ýaqyt máselesin dóp basyp, reformany merzimi pisken kezde jarııalap otyr. Táýelsizdiktiń 25 jyly ishinde búgingi Joldaý maqsattarynyń irgetasy kezeń-kezeńimen quraldy. Ol, eń aldymen, eldegi birliktiń arqasynda jetken jetistikter, bilimdi qoǵam – ıntellektýaldy ult tárbıeleý jáne bolashaǵyna nyq senimdi Birtutas Ult qalyptastyrý.
Elbasynyń joǵary tehnologııaǵa baılanysty aıtqan oıynyń túbinde ıntellektýaldy ultty qalyptastyrý máselesi tur. Sondaı-aq, aýyldyq mekenderdi qala deńgeıine teńestirý máselesin de qoǵamnyń ózi kóldeneń tartyp, kún tártibine shyǵardy. Elbasy atap kórsetken máselelerdiń bári de halyqtyń kóńilinen oryn tabýda. Bul turǵyda Assambleıa janynan qurylǵan Qoǵamdyq kelisim ózine úlken jaýapkershilik júkteıdi. Tóraǵanyń orynbasary Eraly Toǵjanov Prezıdent belgilep bergen josparly mindet pen tapsyrmalardyń birazy tikeleı ár oblys, ár aýdan, tipti ár aýylda qurylatyn Qoǵamdyq kelisim keńesteriniń arnaıy qaraýynda, qadaǵalaýynda bolatynyn aıtty.
Aıgúl AHANBAIQYZY,
«Egemen Qazaqstan»
ALMATY