Ulttyq kásipkerler palatasy QR Ulttyq ekonomıka mınıstrligimen jumys berýshilerdiń Mindetti áleýmettik medısınalyq saqtandyrý júıesine aýdaratyn tólemderiniń paıyzyn azaıtý týraly kelisimge keldi, dep jazady palata.kz.
Bul týraly UKP Qyzmet kórsetý salasy departamentiniń dırektory Janna Ospanova «Keıbir zańnamalyq aktilerge densaýlyq saqtaý jáne áleýmettik-eńbek salasy máseleleri boıynsha ózgerister men tolyqtyrýlar engizý týraly» zań jobasyn talqylaýǵa arnalǵan qoǵamdyq tyńdalym barysynda aıtty.
QR UKP ókili Ulttyq kásipkerler palatasy QR Densaýlyq saqtaý jáne áleýmettik damý mınıstrligimen birlese otyryp, mindetti áleýmettik medısınalyq saqtandyrý (MÁMS) júıesin engizý boıynsha aýqymdy jumys júrgizgenin atap ótti. «Keıbir zańnamalyq aktilerge densaýlyq saqtaý jáne áleýmettik-eńbek salasy máseleleri boıynsha ózgerister men tolyqtyrýlar engizý týraly» zań jobasy UKP-nyń qaraýyna eki márte kelip túsken. Onda Qazaqstan Respýblıkasynyń 18 zańy men 7 kodeksine ózgerister men tolyqtyrýlar engizý qarastyrylǵan.
Atalǵan zań jobasynyń erejeleri ótken jyldyń maýsym aıynda jáne tamyz aıynda Ulttyq kásipkerler palatasynyń alańynda talqylanǵan edi. Oǵan Densaýlyq saqtaý jáne áleýmettik damý mınıstrliginiń, salalyq qaýymdastyqtardyń, iri jumys berýshilerdiń, bıznes-qaýymdastyqtyń ókilderi men QR Parlamenti depýtattary qatysty. О́tkizilgen kezdesýlerdiń nátıjesi boıynsha kásipkerlik qaýymdastyǵynyń usynystary men eskertpeleri Ulttyq palatanyń saraptamalyq qorytyndysyna engizildi.
«Jeltoqsan aıynda QR UKP-nyń kásipkerlerge salynatyn salyqtyq júktemeni ońtaılandyrýǵa qatysty usynystary boıynsha júrgizilip jatqan jumysqa Qazaqstan Respýblıkasy Ulttyq ekonomıka mınıstrligi qosyldy. Másele mynada, mindetti zeınetaqy jarnalaryn tóleý jáne MÁMS júıesine aýdarym jasaý mindettemeleri qatar engizilgendikten, 2020 jylǵa qaraı jumys berýshiniń de, jumysshynyń da eńbekaqy tóleý qoryna jalpy júktemesi 50% bolady, ıaǵnı 2016 jylmen salystyrǵanda, 14%-ǵa artady. Júrgizilgen jumystyń basty jetistigi – jumys berýshilerdiń aýdarymdarynyń %-dyq mólsherlemelerin azaıtý jónindegi Ulttyq ekonomıka mınıstrligimen jasalǵan kelisim», – dep esepteıdi Janna Ospanova.
«Keıbir zańnamalyq aktilerge densaýlyq saqtaý jáne áleýmettik-eńbek salasy máseleleri boıynsha ózgerister men tolyqtyrýlar engizý týraly» zań jobasyna sáıkes, jumys berýshilerdiń MÁMS júıesine aýdaratyn tólemderi 2017 jyly 2%-dan 1%-ǵa deıin, 2018 jyly 3%-dan 1,5%-ǵa deıin, 2019 jyly 4%-dan 1,5%-ǵa deıin, 2020-2021 jyldary 5%-dan 2%-ǵa deıin, 2022 jyly 3%- ǵa deıin azaıady.
Budan bólek, Densaýlyq saqtaý mınıstrligimen birlese otyryp atqarǵan jumys nátıjeleri boıynsha, bıznes-qaýymdastyqtyń 60-tan astam usynysy qaralyp, biraz usynystar eskerildi.
«Mysaly, Qazaqstan Respýblıkasynyń «Mindetti áleýmettik medısınalyq saqtandyrý týraly» zańynda MÁMS júıesinde medısınalyq kómek alý merzimi aýdarymdardyń sońǵy tólemin tólegennen keıin 1 aıdan 3-aıǵa deıin artty. Aýdarymdar men jarnalar somasyn túzetý qajettigi alynyp tastaldy», – dep atap ótti UKP departamentiniń dırektory.
Janna Ospanova atap ótkendeı, MÁMS júıesin tıimdi engizý úshin, bıznes-qaýymdastyqtyń pikirinshe, mynandaı sharalardy júzege asyrý qajet: QR Parlamenti depýtattaryn, qoǵamdy, Ulttyq palata men bıznes-qaýymdastyqty tarta otyryp, tegin medısınalyq kómektiń kepildik berilgen kólemi sheńberinde medısınalyq kómek kórsetýge aýdarylatyn qarjy shyǵynyna aýdıt júrgizý. «Aýdıt qarjylyq aǵyndardyń móldirligin, qarjynyń qandaı maqsattarǵa jumsalyp jatqanyn, olardy paıdalanýdyń tıimdiligin kórsetedi. Sondaı-aq tegin medısınalyq kómektiń kepildik berilgen kólemi, mindetti áleýmettik medısınalyq saqtandyrý jáne erikti medısınalyq saqtandyrý qyzmetterin quramdastyrý múmkindikterin eskere otyryp, medısınalyq qyzmet kórsetý sapasyn jaqsartýdyń jol kartasyn ázirleý qajet. Emdelýshiniń elektrondy pasportyn engizýdi jyldamdatyp, 2018 jyldyń 1 qańtaryna deıin kópfýnksııaly aqparattyq júıeni engizýimiz kerek. Tegin medısınalyq kómektiń kepildik berilgen kólemi men mindetti áleýmettik medısınalyq saqtandyrý aıasynda medısınalyq kómek kórsetý kezinde jekemenshik medısınalyq uıymdardyń medısınalyq uıymdar jelilerin qurýǵa qajetti resýrstaryn barynsha eskerý qajet. Al jumysshylary aýryp qalǵan jaǵdaıda, erikti saqtandyrý sharty boıynsha jumys berýshi tóleıtin saqtandyrý syıaqylaryn jeke tabys salyǵy kiristerinen alyp tastaý qajet», – dep atap ótti ol.