Halyqaralyq valıýta qory (HVQ) Qazaqstan ekonomıkasynyń 2017 jyly 2,5 paıyzǵa ósetindigin atap kórsetti. HVQ 8 aqpan kúngi taratqan aqparatynda
2017 jyly Qazaqstan ekonomıkasynyń ósimi 2016 jylǵy qazan aıynda boljanǵan 0,6 paıyzdyń ornyna, 2,5 paıyzǵa deıin ósetindigin málimdedi, dep habarlaıdy «RIA Novostı» agenttigi.
Aqpan aıynyń basynda ótken Qazaqstan Úkimetiniń keńeıtilgen otyrysynda Memleket basshysy Nursultan Nazarbaev el ekonomıkasyn odan ári damytý úshin qajetti áleýet bar ekenin aıta kelip, «Taıaý jyldary ımport almastyrý ishki jalpy ónimniń 5 paıyzǵa deıingi ósimin bere alady. Eksportqa belsendi túrde memlekettik qoldaý kórsetý jaǵdaıynda ónerkásiptiń basymdyǵy bar sektorlaryndaǵy ósimniń ózi ǵana 6 mıllıard dollar bolady. Bul eksport kólemin 20 paıyzǵa deıin, ishki jalpy ónimniń kólemin 5 paıyzǵa deıin artttyrýdy qamtamasyz etedi», dep atap kórsetti.
Elimizde júzege asyrylyp jatqan ekonomıkalyq jáne qurylymdyq reformalardyń ósimge bastaıtyndyǵyn naqty boljaǵan Elbasynyń reformatorlyq kóregendigin halyqaralyq bedeldi uıym HVQ da moıyndaǵandaı. «Qazaqstan ekonomıkasynyń ósimine munaı óndirisiniń artýy jáne qurylymdyq reformalardyń júzege asyrylýy oń yqpal etti», deıdi Halyqaralyq valıýta qory óziniń málimdemesinde.
Sonymen birge, uıymnyń aqparattyq málimdemesinde «Qazaqstan burynǵysynsha munaıdyń tómen baǵasynan jáne Reseı, Qytaı jáne Eýropa elderi ekonomıkasynyń baıaý damýynan týyndap otyrǵan qıyndyqtardy laıyqty jeńe bilýde. Bıýdjettik kómekti targetteý, valıýtanyń aıyrbas baǵamyn retteý, óndiristi basqarýdy jetildirý jáne qurylymdyq reformalar ahýaldy turaqtandyrýǵa múmkindik berdi. Mine, osyndaı ıgi qadamdar 2017 jyly ekonomıkanyń ósimine oń yqpal etetin bolady», dep atap kórsetilgen.
Jylqybaı JAǴYPARULY,
«Egemen Qazaqstan»