Jambyl óńiriniń mektepterinde «Robototehnıka» úıirmelerin ashýǵa kóńil bólinip jatyr, dep habarlady Jambyl oblysy ákimdiginiń baspasóz qyzmeti.
«Tarazdaǵy nómiri 54-mektep oqýshylary qoldary bosaı qalsa, osy synypqa umtylady. Balǵyndar robot qurastyryp, ony basqarýdy úırenýde. Olar san túrli tehnıka jınaýǵa arnalǵan arnaıy qurastyrmaly bólshektermen jumys isteıdi», - delingen habarlamada.
Aımaqtaǵy 6 oqý oshaǵynda qazir osyndaı úıirmeler jumys istep tur. Qyzyqty da qajetti ispen alys aýyldardaǵy balalar da qamtylǵan. Odan bólek, Tarazdaǵy tehnıkalyq shyǵarmashylyq ortalyǵynda 100-ge tarta jetkinshek robot jasaýmen aınalysýda. Balalar qolymen jasalǵan sondaı dúnıelerdiń biri – arba.
Oqýshylar dóńgelektiń ornyna temir aıaq jasap, qadamdap júretindeı qylǵan. Aıtýlarynsha, sol arqyly aýyr júkterdi ońaı tasyp, qyrǵa qaraı shyǵýda qınalmaýǵa bolady. Qazir úıirme qatysýshylary elektrondy baǵdarlamalar jasaý isin myqtap meńgerýge kirisken. Ol baǵdarlamalar kómegimen robottarǵa kúrdeli tapsyrmalar berip, oryndatý kózdelýde.
Oblysta mundaı úıirmeleri bar mektepter sanyn arttyrý kózdelgen. Aımaq basshysynyń tapsyrmasyna sáıkes oblystyq bilim basqarmasy jańa oqý jylyna keminde 11 oqý oshaǵyn qamtýy tıis. Basty kóńil aýyldyq jerlerdegi bilim nysandaryna berilmekshi.