Qazaqstannyń ońtústiginde el halqynyń 38 paıyzy turady. Olar Qyzylorda, Ońtústik Qazaqstan, Jambyl jáne Almaty oblystary. Al shamamen 17 paıyz halyq soltústik óńirlerde turyp jatyr. Bul týraly búgin Senatta ótken jıynda Eńbek jáne halyqty áleýmettik qorǵaý mınıstri Tamara Dúısenova málimdedi.
"Egerde mundaı jaǵdaı odan ary saqtala beretin bolsa, onda boljamǵa sáıkes 2050 jylǵa qaraı ońtústik óńirlerdiń halqy 5,2 mln. adamǵa jetedi. Soltústik óńirlerdiń halqynan 4 esege asyp túsedi, al soltústik óńirlerdiń turǵyndary 1 mln. adamǵa kemıdi", - dedi mınıstr. Onyń aıtýynsha, qazirdiń ózinde halyqtyń qonystanýda teńgerimsizdik baıqalady.
Mınıstr ońtústik óńirde 100 jańa týǵan balaǵa 12 qart adamnan kelse, soltústik óńirde 100 jańa týǵan balaǵa 53 qart adamnan keletinin aıtty. Onyń aıtýynsha, «Jumyspen qamtý jol kartasy» júıege asyrylǵan jyldardyń ishinde ońtústik óńirlerden Soltústik Qazaqstan, Qostanaı jáne Pavlodar oblystaryna 19 myń adam kóship barǵan. Olarǵa baǵdarlama aıasynda 5,4 myń qyzmettik páter men jataqhanalarda bólmeler salynǵan.
«Bul saıasat odan ary da jalǵasa beredi. Degenmen, endigi ýaqytta jumyspen qamtýdyń jańa baǵdarlamasy aıasynda baspana salý qarastyrylmaıdy. О́ıtkeni, «Nurly jol» baǵdarlamasy júzege asyrylýda. Biraq, jumyspen qamtýdyń jańa baǵdarlamasy aıasynda qonys aýdarýshylardyń jalǵa alatyn baspanalaryna tólem jasaý múmkinshiligi qarastyrylady. Otbasy músheleriniń sanyna baılanysty árbir múshege 34 myńnan 68 myń teńgege deıin baspana jaldaýǵa sýbsıdııa beriledi. Máselen, bir adam kelse, onda oǵan qalalyq jerde baspana jaldaýǵa 20 AEK beriledi. Bul shamamen 45 380 teńge. Eger otbasynda 2-den 4 adamǵa deıin bolsa,onda 25 AEK beriledi. Munan bólek, jergilikti bıýdjet esebinen turǵyn úı salý múmkinshiligi de qarastyrylýda», - dedi ol.