«EXPO 2017» kórmesiniń ashylýyn tamashalaýǵa elimizge álemniń túkpir-túkpirinen qonaqtar keledi dep kútilýde. Olarǵa jaıly jaǵdaı jasaý, ózderiniń salttaryna jaqyn qyzmet kórsetetin qonaqúılermen, tıisti taǵam ónimderimen qamtamasyz etý sharalary uıymdastyrylyp keledi. Musylman elderinen keletin qonaqtar da az emes, dep jazady Qazaqstan musylmandary dinı basqarmasynyń resmı saıty. Musylman elderinen keletin qonaqtarǵa joǵary deńgeıde qyzmet kórsetý maqsatymen Astana qalasynyń qonaqúılerin, qoǵamdyq tamaqtaný oryndaryn sharıǵat talaptaryna sáıkes sertıfıkattaý qolǵa alynyp otyr. Osyǵan oraı, Astana qalasy ákimshiliginiń «Astana Konvenshn Bıýro» JShS-nyń dırektory Sanııar Áıtekenov Qazaqstan musylmandary dinı basqarmasynyń tóraǵasy Erjan qajy Malǵajyulynyń qabyldaýynda boldy. Kezdesý barysynda Bas múftı QMDB tarapynan halal sertıfıkattaý salasynda «Halal Damý» JShS qyzmet atqaryp jatqandyǵyn aıtyp, bul salanyń máni men mańyzyna qysqasha toqtalyp ótti. Otyrys sońynda taraptar birlesip jumys jasaýǵa degen ózara yqylastaryn bildirip, ekijaqty memorandýmǵa qol qoıdy. Endigi kezekte QMDB men Astana ákimshiligi birlesip qalalyq qonaqúılerdi sharıǵat talaptaryna sáıkes sertıfıkattaý jumystaryna kirisýdi josparlap otyr.