Qazaqstan halqy Naýryz meıramyna daıyndyqty bastap ketti. Astanada halyqtyq serýen 21-23 naýryz kúnderi ótedi. Qaladaǵy birneshe alańda merekelik sharalar uıymdastyrylady, dep habarlaıdy qala ákiminiń baspasóz qyzmeti.
19-23 naýryz – demalys kúnderi, sol sebepti qala turǵyndarynyń demalysyna erekshe kóńil bólingen.
Basty shara 21 naýryz kúni «Saryarqa» velotreginde uıymdastyrylady, 21-23 naýryz kúnderi «Han Shatyr» mańyndaǵy alańda etnoaýyl qanat jaıyp, halyqtyq serýen ótedi.
Sondaı-aq 21-22 naýryz kúnderi «Qazaq eli» monýmenti alańynda, qalalyq alańda, «Stýdentter» saıabaǵynda, 22 naýryzda «Jastar» teatrynyń aýmaǵynda ótedi. Barlyq alańdarda mazmundy konserttik baǵdarlamalar, sporttyq jarystar uıymdastyrylady, kıiz úıler tigilip, altybaqandar ornatylady, kelýshiler dástúrli taǵamdardan dám tata alady.
Naýryzdyń 18-inen 22-sine deıin Kúıgenjar, Mıchýrıno, Promyshlennyı, Internasıonalnyı, Jeleznodorojnyı, Prıgorodnyı, Úrker, Kóktal-1, О́ndiris turǵyn alaptarynda Naýryz meıramyna oraı halyqtyq serýen ótedi. Onda da kıiz úıler tigilip, jármeńkeler, konsertter uıymdastyrylady.