QR Premer-Mınıstri Shyǵys Qazaqstan oblysyna jumys sapary aıasynda Semeı qalasynyń sol jaq jaǵalaýyndaǵy turǵyn-úı jáne ákimshilik ǵımarattardyń 70%-yn jylýmen qamtamasyz etetin JEO-1-diń qaıta jóndeý jumystaryn tekserdi, dep jazady primeminister.kz.
Sondaı-aq, B. Saǵyntaevqa óńirdiń basymdyqty jobalarynyń biri bolyp tabylatyn JEO-3-tiń qurylys jumystary týraly esep berildi. Qazirgi ýaqytta joba boıynsha tehnıkalyq-ekonomıkalyq negizdeme ázirlengen jáne memlekettik saraptamadan dáıekteme alynǵan. Jobanyń maqsaty – tıimdiligi men senimdiligi tómen kóptegen qazandyqtardyń qýattylyqtaryn almastyrý, jylýlyq júktemelerdiń ósimin jabý, tehnologııasy tıimdi jylý jáne elektr energııasy óndirisiniń ekologııalyq taza kózin qalyptastyrý.
Sonymen qatar Baqytjan Saǵyntaev Shyǵys Qazaqstan oblysyna jumys sapary aıasynda «Nurly jol» memlekettik baǵdarlamasy aıasynda júrgizilip jatqan Semeı qalasynyń halyqaralyq áýejaıynyń qaıta jóndelý jumystarymen jáne júıesimen tanysty.
Oblys ákiminiń orynbasary S. Aqtanov QR Premer-Mınıstri Baqytjan Saǵyntaevqa áýejaıdyń qaıta jóndelý jumystarynyń barysy týraly aıtyp berdi. Onyń aıasynda ushyp-qoný jolaǵy 2,7 shaqyrymnan 3,3 shaqyrymǵa deıin uzartylatyn bolady, jańa apattan qutqarý stansasy turǵyzylady, jáne kommýnıkasııanyń barlyq túri almastyrylatyn bolady. Budan ózge, B. Saǵyntaevqa áýejaıdyń qaýipsizdik júıesiniń jumystary týraly esep berildi.
Aıta ketý kerek, Semeı qalasynyń áýejaıy tranzıttik baǵdarlar úshin óte qolaıly geografııalyq jerde ornalasqan jáne qaıta qurý jumystarynan keıin júk laınerlerinen bastap, kez-kelgen ushaq túrlerin qabyldaı alatyn bolady. Búgingi tańda áýe aılaǵy jylyna shamamen 70 myń adamǵa qyzmet kórsetedi.