Qazaqstan-Izraıl saýda-ekonomıkalyq yntymaqtastyǵy jónindegi 7-shi otyrysta eki eldiń astanalary arasynda tikeleı áýe reısin ashý máselesi talqylandy.
«Úkimetaralyq komıssııa otyrysynda kóterilgen taǵy bir ózekti másele bizdiń elderimizdiń astanalary arasynda tikeleı áýe reısin ashý boldy. Qazaqstan óz tarabynan EKSPO kórmesine daıyndyq aıasynda kelesi jyly mundaı áýe reısteriniń oryndalýyna kedergi keltiretin barlyq tosqaýyldardy alyp tastaýdy josparlaýda», - dedi ol.
Sonymen qatar komıssııa otyrysynda bıyl jeltoqsan aıynyń ortasynda Izraıl Premer-Mınıstri Bınıamın Netanıahý Qazaqstanǵa saparmen keletini aıtyldy.
«Búgin biz Qazaqstan Respýblıkasy men Izraıl memleketi arasyndaǵy úkimetaralyq komıssııanyń 7-shi otyrysyn ótkizip jatyrmyz. Bul - Izraıl Premer-Mınıstri B.Netanıahýdyń elimizge josparlanǵan sapary aldyndaǵy mańyzdy kezdesý. Sapar osy jyldyń jeltoqsan aıynyń ortasyna josparlanǵan. Biz búgin elderimiz arasyndaǵy tıimdi yntymaqtastyqtyń birqatar baǵyttaryn talqyladyq. Naqty birqatar kelisimge qol qoıylady jáne ózge de qosymsha sheshimder qarastyrylyp jatyr. Ol qujattar saýda-ekonomıkalyq, ınvestısııalyq jáne túrli salalardaǵy bizdiń elderimizdiń yntymaqtastyǵyn kózdeıdi. Árıne, agroónerkásip keshenin damytý, sý resýstary, ınnovasııa salalaryndaǵy yntymaqtastyq ózge de baǵyttarǵa tyń serpin beretindigi sózsiz», - dedi komıssııa otyrysy aıasynda BAQ ókilderine suhbat bergen Qarjy mınıstri Baqyt Sultanov.