«Habar» telearnasy Memleket basshysy Nursultan Nazarbaevtyń ǵalamdyq deńgeıdegi beıbitsúıgishtik bastamalaryna oraı «Álem. XXI ǵasyr» taqyryby aıasynda telemarafon uıymdastyrdy.
Máskeý, Ankara, Brıýssel, Berlın qalalaryndaǵy saıası sarapshylar telearna arqyly Astanamen tikeleı efırge qosylyp, elimizdiń Táýelsizdiktiń shırek ǵasyrynda qol jetkizgen jetistikterine jáne Qazaqstan Prezıdentiniń álemdik qaýipsizdikti saqtaý baǵytyndaǵy baǵaly bastamalaryna qatysty óz oı-paıymdarymen bólisti.
Máselen, Energetıka Hartııasynyń bas hatshysy Ýrban Rýsnag arna jýrnalısiniń «Qazaqstannyń Táýelsizdik alǵan jyldardan bergi jetken jetistikteriniń ishinde nege aıryqsha toqtalar edińiz?» degen saýalyna bylaı dep jaýap berdi. «Men shyn júrekten Qazaqstandy jáne qazaqstandyqtardy Táýelsizdiktiń 25 jyldyǵymen quttyqtaımyn. Bul aıtýly mereıtoı osynaý jyldardyń bederinde Qazaq halqynyń baǵyndyrǵan belesterimen tuspa-tus kelip qana qoımaı, ony aıqyn kórsetip otyr. Energetıka Hartııasy Qazaqstannyń jer qoınaýyndaǵy qazba baılyqtardy ıgerý jáne olardy paıdalaný boıynsha óz ustanymdary men qaǵıdalaryn jahandyq turǵyda nyǵaıtyp kele jatqanyn jaqsy biledi. Mundaı tabıǵı baılyqtar Qazaqstan ekonomıkasynyń damýyna yqpal etip qana qoımaı, bolashaqty oılaı otyryp, damýdyń jańa baǵytyna – jańartylǵan energııa kózderin ıgerýge kóshýine, osy baǵytqa qaraı qadam basýyna sep bolýda. Osyndaı baǵytty ustanǵan Qazaqstannyń bolashaǵyna senimmen qaraýǵa bolady dep oılaımyn».
Qazaqstannyń beıbitshilikti qamtamasyz etýge qosqan úlesi, sonymen qatar, beıbitsúıgishtik qasıetti alǵa ilgeriletý baǵytyndaǵy turaqty bastamalary týraly búkil álem biletini anyq. Qazaqstannyń bul ustanymdaryna qurmetpen qaraıtyn memleketterdiń biri – Germanııa. Sondyqtan, bul másele jóninde Ortalyq Azııa elderi boıynsha nemis sarapshysy Gıýnter Knabe aıtyp berdi. Ol tilshiniń: «Gıýnter, siz Qazaqstannyń jetistikteri týraly ne aıtar edińiz?» – degen saýalyna jaýap bermesten buryn, eń aldymen, qazaq halqyn Táýelsizdiktiń shırek ǵasyrlyq mereıtoıymen quttyqtady. «Men barsha qazaq jurtyn 25 jyldyq mereıtoımen quttyqtaı otyryp, baqyt, sáttilik tileımin», – dedi ol. Osylaı degen Gıýnter Knabe álemdi alańdatqan ıadrolyq qarý tóńiregindegi máselesindegi Qazaqstannyń qadamdaryn erekshe atap ótti.
«Meniń oıymsha, aýyz toltyryp aıtatyn eń basty jetistikterdiń biri – Qazaqstannyń ıadrolyq qarýdan óz erkimen bas tartýy. Sebebi, Táýelsizdik alǵan alǵashqy kezeńde Nursultan Nazarbaevtyń álemdegi kúsh-qýaty boıynsha tórtinshi ıadrolyq arsenaldy tolyǵymen joıý týrasyndaǵy batyl sheshimi bizdiń tarapymyzdan úlken ári tereń qurmet kóretýdi qajet etedi. Men Prezıdenttiń tek ıadrolyq qarýsyzdaný boıynsha kótergen bastamalaryna ǵana emes, búkil dúnıe júzinde beıbitshilikti ornatý baǵytyndaǵy is-qımyldaryna joǵary baǵa berer edim», – dedi ol. Bul rette, sarapshy Elbasy óziniń «Álem. XXI ǵasyr» manıfesi arqyly álemdik derjavalardy jappaı qyryp-joıý qarýynan túbegeıli bas tartýǵa shaqyrǵanyna aıryqsha toqtaldy. «Qazaqstan Kóshbasshysy dúnıe júzi derjavalaryn jappaı qyryp-joıý qarýynan bas tartýǵa jáne álemdegi barlyq áskerı janjaldardy dereý toqtatýǵa shaqyrǵan bolatyn. Qazirgi tańda Prezıdenttiń mundaı bastamalary óte ózekti bolyp tur», – dedi Gıýnter Knabe.
Láıla EDILQYZY,
«Egemen Qazaqstan»