Nıderlandyda ekologııalyq taza úı salý úshin karton qoldanyla bastady, dep habarlaıdy CNN.
Alǵash 4 jyl buryn Amsterdamnyń Shıphol áýejaıyna osyndaı jolmen salynǵan kórme zaly qazir meıramhana qyzmetin atqaryp otyr. Sodan beri 10 úı jasalǵan. Onyń kóbi Nıderlandyda, bireýi Londonda, bireýi Germanııaa.
Bul joba 2012 jyly usynylypty. Wikkelhouse úıleriniń ár segmentinde 24 qabat karton bar. Ol ekologııalyq taza jelimmen jabystyrylǵan. Úıdiń baǵasy 26 myń dollardan bastalady eken.
Joba avtorlarynyń aıtýynsha, bul úıler qarapaıym ǵımarattarǵa qaraǵanda úsh ese ekologııalyq taza. Sonymen qatar sýǵa tózimdi jabyndymen qaptalǵan. Bul úılerdi jasaýshy kompanııa ony 15 jylǵa shydaıdy dese, joba avtorlary jaqsy kútim bolsa, 50 jylǵa deıin turýǵa bolady dep otyr.
"Bolashaqta barlyq úı kartonnan jasalady deı almaımyn. Biraq bul adamdarǵa qatyp qalǵan qaǵıdamen ǵana ómir súrýden basqa joldardyń da bar ekenin kórsete alady", deıdi joba avtorlary.