QR Premer-Mınıstri B.Saǵyntaev Úkimet otyrysynda taıaý arada nátıjeli jumyspen qamtýdy jáne jappaı kásipkerlikti damytý baǵdarlamasyn maquldaýdy aıaqtap, ony bekitýge shyǵarýdy tapsyrdy.
Premer-Mınıstr jasalǵan baǵdarlama aıasynda jumyssyz azamattarmen jumys isteý barysy ózgeretinin atap ótti.
«Buryn «Jumyspen qamtý 2020» jol kartasy baǵdarlamasy boıynsha ýaqytsha jumys oryndaryna kóńil bólinse, endi oqytý arqyly tek qana turaqty jumys oryndaryna kóńil bólinedi. Eń bastysy, adamdarǵa óz isterin ashýǵa jáne jańa jumys oryndaryn qalyptastyrýǵa múmkindik beremiz. Jaýapty organdar anyqtaldy, ókilettilikter berildi, olardyń arasynda jergilikti atqarýshy organdar bar», – dedi B.Saǵyntaev.
Premer-Mınıstr osy baǵdarlama boıynsha barlyq ázirlik jumystaryn aıaqtap, ony 15 jeltoqsanǵa deıin Úkimetke bekitýge usynýdy tapsyrdy.
Memleket basshysy Nursultan Nazarbaevtyń tapsyrmasy boıynsha, QR Úkimeti jańadan Nátıjeli jumyspen qamtý jáne jappaı kásipkerlikti damytý baǵdarlamasyn jasaǵan bolatyn. Bul baǵdarlamanyń maqsaty – nátıjeli jumyspen qamtýǵa jaǵdaı jasaı otyryp, halyqqa óz tabystaryn arttyrýǵa múmkindik berý.
Arnur ASQAROV,
«Egemen Qazaqstan»