QR Ulttyq ekonomıka mınıstrligi jyl saıyn kásipkerlikti qoldaýǵa 2,5 myń mıkronesıe bólmek. Bul jańa jobanyń operatory bolyp "Damý" kásipkerlikti damytý qory" AQ bekitildi. Bul týraly búgin Úkimet otyrysynda Ulttyq ekonomıka mınıstri Qýandyq Bıshimbaev aıtty.
"Mıkronesıeler jańa kásiporyndar ashýǵa nemese bıznesti damytýǵa 6 paıyzdyq mólsherlememen 16 mıllıon teńgege deıin beriledi. Mıkronesıe berý ekinshi deńgeıli bankter men mıkroqarjy uıymdary arqyly júzege asyrylatyn bolady", - dedi Bıshimbaev.
Mınıstrdiń aıtýynsha, jumyssyzdyqpen kúresip, ózin-ózi qamtıytyn azamattar sanyn arttyrý úshin "Bıznestiń jol kartasy - 2020" baǵdarlamasy boıynsha qalalarda oqytý kózdelip otyr. Bul qysqamerzimdi kýrstar servıstik qyzmet kórsetý, bıznes-tájirıbe men kásipkerliktiń qurylýy týraly bolady. Maqsatty ındıkatorlar boıynsha jyl saıyn 2,5 myń qaryz berilip, olardyń 20 paıyzy startap-jobalarǵa baǵyttalady.
Qalalardaǵy mıkronesıeni berýge de "Damý" AQ operator bolyp bekitildi. Mıkronesıe berýge jalpy transfertten 7 mıllıard teńge, "Bıznestiń jol kartasy - 2020" baǵdarlamasy arqyly respýblıkalyq bıýdjeten 3 mıllıard teńge qarastyrylǵan.