Kolýmbııada bolǵan ushaq apatynan 75 adam qaza taýyp, 6 adam tiri qalǵan. Onyń úsheýi fýtbolshy, bireýi jýrnalıst, ekeýi ekıpaj múshesi, dep habarlaıdy The Guardian. Sonymen qatar Brazılııa basylymdarynyń habarlaýynsha, 81 adamnyń 21-i jýrnalıst ekendigi anyqtalǵan.
[caption id="attachment_78998" align="aligncenter" width="560"] Tiri qalǵan fýtbolshylar[/caption]
"6 adam tiri qalǵan edi. О́kinishke oraı, aýrýhanaǵa barar jolda bireýi qaıtys boldy" - dedi aımaqtyq polısııa basshysy jýrnalısterge bergen suhbatynda.
Bul apatqa baılanysty Brazılııa Prezıdenti Mıshel Temer óziniń Tvıtterdegi paraqshasynda dúnıeden ótkenderdiń jaqyndaryna kóńil aıtty. Santa-Katarına gýbernatory Raımýndo Kolombo da halyq aldyna shyǵyp, apat týraly sóz sóıledi. Qazir komanda jankúıerleri oıynshylar daıyndalǵan stadıonǵa jınalyp jatyr.
Buryn habarlaǵanymyzdaı, ushaq Bolıvııadan Kolýmbııaǵa ushyp bara jatqan. Kolýmbııa azamattyq avıasııasynyń basshysy Alfredo Bokanegranyń aıtýynsha, ushaq qonýǵa aldyn-ala ruqsat suraǵan. Radıo arqyly: "Ushaq tótenshe jaǵdaı týraly habarlaıdy. Bizge tezirek qonýǵa ruqsat kerek", dep suraǵan jerden shamamen túngi saǵat on ekiler kezinde baılanys úzilip ketedi. Ushaq ushý alańyna ne sebepti qona almaǵany ázirge belgisiz bolyp otyr. Bir aqparattarda janarmaı taýsylǵany aıtylsa, endi bireýler elektr jelisiniń aqaýlary sebep bolǵan degen joramaldar aıtýda. Resmı aqparat áli berilmedi.
Sonymen qatar aýa raıynyń nasharlyǵy da qutqarý jumystaryna birshama kedergiler keltirgen. Qazir júzge jýyq adam apat ornynda jumys istep júr. Medelın áýejaıy túnde qatty jańbyr jaýǵandyqtan, qutqarý jumystary az ýaqytqa toqtatylǵanyn Tvıtter paraqshasynda habarlady.
Bul oıynǵa barmaı qalǵan brazılııalyq qaqpashy Nıvaldo UOL Esporte saıtyna bergen suhbatynda tańǵy bester shamasynda oıanǵanyn, sol kezde óziniń komandalastaryna habarlasa almaǵanyn aıtqan.