Reseı konsýly Saıd Zabıtov óz oıyn osylaı sabaqtady
Oral qalasynda «Táýelsiz Qazaqstannyń qalyptasýy men damýyndaǵy Tuńǵysh Prezıdenttiń róli» atty keń aýqymdy konferensııa ótkizildi. Oǵan qatysýshylar Elbasynyń memleket qurý men saıası jáne áleýmettik reformalardy iske asyrýdaǵy ulan-ǵaıyr eńbekteri jóninde salmaqty da salıqaly oı-pikirler órbitti. Sondaı-aq, konferensııada Nursultan Nazarbaev belgilep bergen qazaqstandyq damý joly men modeli týraly júıeli de jan-jaqty áńgimeler qozǵaldy.
Elbasy saıasatyna tarıhı turǵydan taldaý jasaǵan M.О́temisov atyndaǵy Batys Qazaqstan memlekettik ýnıversıtetiniń dosenti, tarıh ǵylymdarynyń kandıdaty Jańabek Jaqsyǵalıev Ábilqaıyr han men Elbasy Nursultan Nazarbaev saıasatynda sabaqtastyq bar ekenin baıandap berdi. Jańabek Jańabaıulynyń aıtýynsha kásibı tarıhshylarǵa jaqsy tanys álem tarıhyndaǵy aıtýly tulǵalar qamtylǵan «Adamzat hronıkasy» kitabyna tól tarıhymyzdan Ábilqaıyr han men Nursultan Nazarbaev engizilgen. Bul kezdeısoqtyq bolmasa kerek. Atalǵan tulǵalar qazaq halqynyń taǵdyry tarazyǵa tartylǵan jáne taǵdyrsheshti tusta oń sheshim qabyldaǵan bolatyn. Áıtpese, halqymyzdyń ult retinde ómir súrýi de ekitalaı bolýy ǵajap emes edi.
Batys Qazaqstan oblysyndaǵy orys mádenı ortalyǵynyń tóraǵasy Sergeı Pogodın táýelsiz Qazaqstandy qalyptastyrýdaǵy Elbasynyń sheksiz róli týrasynda sóz órbitti. «Keıbir saıasatkerler men zertteýshiler eger bir memlekette bes túrli ulttyń ókili bolsa, ol elde turý qıyndaý bolatynyn aıtady. On etnos ókili ómir súrse, onda ultaralyq jaǵdaı eki ese qıyndaıdy. Al júz bolsa, onda elde ómir súrý múmkin emes dep tujyrymdaıdy eken», dedi ol. Al Qazaqstanda qazirgi tańda 138 ulttyń ókili tatý-tátti ómir súrýde. Bul Respýblıka Prezıdenti Nursultan Nazarbaevtyń sarabdal saıasatynyń arqasynda múmkin boldy dep esepteımin. Sondyqtan men ózimdi osyndaı prezıdenti bar memlekette ómir súrip jatqanym úshin baqytty sanaımyn», dep qorytyndylady óz sózin S.Pogodın.
Jıyn barysynda sóz alǵan Reseıdiń Oral qalasyndaǵy konsýly Saıd Zabıtov Qazaq eli 25 jyl ishinde óz Prezıdenti Nursultan Nazarbaevtyń basshylyǵymen bıik belesterdi baǵyndyrǵanyn atap kórsetti. Meni, ásirese, qazaqstandyqtardyń qoǵamdyq kelisim salasyndaǵy jetistikteri ár kez tánti qylady, dedi ol.
Konferensııa barysynda sondaı-aq, «Zaman» Batys Qazaqstan oblystyq óndirýshiler qaýymdastyǵynyń tóraıymy Aıgúl Týrkına, M.О́temisov atyndaǵy Batys Qazaqstan memlekettik ýnıversıtetiniń tórtinshi kýrs stýdenti Áıgerim Tólen jáne basqa qoǵamdyq uıym ókilderi Elbasy men el táýelsizdigi jáne onyń erteńi týraly óz oı-pikirlerin ortaǵa saldy.
Temir QUSAIYN,
«Egemen Qazaqstan»
ORAL