«Atameken» Ulttyq kásipkerler palatasynyń Tóralqa Tóraǵasy Sybaılas jemqorlyqqa qarsy is-qımyl máseleleri jónindegi respýblıkalyq kásipkerler forýmynda óz pikirin ortaǵa saldy, dep habarlaıdy palata.kz.
Forým jumysyna Memlekettik qyzmet isteri jáne sybaılas jemqorlyqqa qarsy is-qımyl agenttiginiń Tóraǵasy Qaırat Qojamjarov pen «Atameken» UKP Tóralqa Tóraǵasy Tımýr Qulybaev, sondaı-aq, QR Parlamenti depýtattary, memlekettik mekemelerdiń, azamattyq jáne kvazımemlekettik sala ókilderi, bıznes-qaýymdastyq jáne basqa da taraptar qatysty.
Qaırat Qojamjarov kóptegen ister atqarylyp, zańdar qabyldanǵanymen, syıbaılas jemqorlyqtan tolyq arylý múmkin bolmaı otyrǵanyn jetkizdi.
«Búgingi shara otandyq bıznesti jaqsartýǵa óz áserin tıgizedi degen senimdemiz. Ol úshin Táýelsizdiktiń ótken jyldary bıznesti júrgizýge qolaıly quqyqtyq negiz qalanyp, ruqsat berý-baqylaý qyzmetteri yqshamdaldy. Alaıda áli de kásipkerlikke qysym kórsetilip jatqanyn ańǵarýǵa bolady. Ár memlekettik qyzmetker qoǵamǵa qaltqysyz qyzmet etip, kásipkerlik salany qoldaý asyl mindeti ekenin esten shyǵarmaýy tıis. Endi Agenttiktiń aýmaqtyq bólimsheleriniń basshylary bıznesti sheneýnikterdiń jónsiz kıligýinen qorǵaýy turǵysynan baǵalanady. Bıznes te para berýge, zańdy buzýǵa beıim bolyp turmaýy kerek. Bul máselede ustanymymyz aıqyn, baǵytymyz nyq», - dep málimdedi ol.
«Atameken» Ulttyq kásipkerler palatasynyń Tóralqasy Tóraǵasy Tımýr Qulybaev ta Ulttyq palata jemqorlyqqa qarsy kúreste memlekettik ınstıtýttarǵa kómekke kelýge ázir ekenin, Qazaqstan zańnamasynda «korporatıvtik sybaılas jemqorlyq» uǵymy áli de kórinis tappaǵan atap ótti. Máselen «Atameken» UKP jyl saıynǵy «Iskerlik ahýal» zertteýi sheńberinde «Kásipkerler kózqarasyndaǵy jemqorlyq jaǵdaıy» arnaıy sholýyn daıyndaǵan. Ol boıynsha sońǵy 5 jylda jemqorlyq derekteri 11%-ǵa jıilegen, ıaǵnı ár bıznesmenniń ekinshisi kúndelikti onymen jolyǵýda.
«Qazaqstan «Transparency International» halyqaralyq zertteý dereginde jemqorlyq jaǵdaıy boıynsha 123-shi orynda tur. Osy oraıda Elbasynyń elimizdi álemniń damyǵan 30 memleketi qataryna engizý tapsyrmasyn umytpaǵan jón, ıaǵnı azamattyq qoǵamnyń qoldaýynsyz, tek jazalaý sharalarymen ahýaldy túbegeıli ózgerte almaımyz. Jemqorlyqqa tek birlese toıtarys berýge bolady, - dep «Atameken» UKP jetekshisi sózin jalǵady. – Bul rette Úkimetpen birlesken raıda lısenzııalar men ruqsat berýler 72 paıyzǵa qysqaryp, jeke zań baptaryna toptastyryldy. Endigi sátte jańa ruqsat túrlerin qoldaný úshin sheneýnikterge bızneske retteýshi áser etý taldaýynan ótýden bólek, Parlament depýtattarynyń qoldaýyn ıelengeni qajet bolady».
«Memlekettik mekemelerdiń tekserý paraqtarynda 28 myńnan astam talap bar. Sanıtarlyq-epıdemıologııalyq qadaǵalaý baǵytynda qazirgi kezde 63 sanıtarlyq ereje bolsa, onyń 11 myńnan astamy kásipkerlerge qoıylatyn talaptar bolyp otyr. Bunyń bárin oryndaý múmkin emes, ıaǵnı bul jaıttar paraqor sheneýnikterdi erkinsitip, júgensiz ketýine jol ashýda. Sáıkes talaptardyń 82%-yn qysqartyp, 2 myńǵa jýyǵyn ǵana qaldyrýdy usynamyz», - dep nusqady UKP Tóralqa Tóraǵasy.
Sonymen qatar, «Atameken» Ulttyq kásipkerler palatasy, zańnamany izgilendirý jumystaryna belsendi atsalysyp, Ákimshilik quqyqbuzýshylyqtar jaıly kodekske 25 tujyrymdamalyq usynys jasaǵan. Normatıvtik-quqyqtyq aktilerdi qoǵamdyq jemqorlyqqa qarsy saraptaý júrgizilýde. Osy oraıda, kelesi jyly, bul jumysqa Agenttiktiń de qatysyp qalýy yqtımal.
«Úkimetpen kelesi jyldan bastap mektepterde «Kásipkerlik negizderi oqytylatynyn kelistik. Bul baǵdarlama aıasynda jemqorlyqqa qarsy mádenıet qalyptastyrý jóninde arnaıy kýrstar qosý kerek. Balalyq shaqtan jastardyń boıynda sybaılas jemqorlyqqa múlde tózbeýshilik qasıetin tárbıelegenimiz abzal», - dedi Tımýr Qulybaev.
Bıylǵy «Atameken» sezinde Qazaqstan kásipkerleriniń sybaılas jemqorlyqqa qarsy is-qımyl hartııasyn bekitilgeni belgili. Bul qujat elimizdiń sybaılas jemqorlyqqa qarsy saıasatyn isker toptardyń sózsiz qoldaıtyndyǵyn aıqyndaýda. Hartııa halyqaralyq aldyńǵy qatarly tájirıbege negizdelgen sybaılas jemqorlyqqa qarsy is-qımyldyń tıimdi tetikterin engizý jónindegi otandyq bıznestiń erikti mindettemesinen shyǵady.
Tımýr Qulybaev UKP men Agenttik birlese ázirlegen 2017 jylǵa arnalǵan Jol kartasy naqty qadamdardan turatynyn atap ótti. Birinshiden salyqtyq ákimshilik etý, veterınarlyq qadaǵalaý sııaqty 16 saladaǵy jemqorlyq táýekelderine taldaý júrgizilip, ekinshiden atalǵan taldaý negizinde kelesi jyldyń aıaǵyna deıin zańnamany jetildirýge qatysty usynystar berilmek. Úshinshiden kvazımemlekettik sektordaǵy jemqorlyqqa qarsy tetikterdi jetildirý jaǵy qarastyrylmaq.
«Jemqorlyqpen kúres shaǵyn jáne orta kásipkerlikti damytýǵa qolaıly bıznes-orta qalyptastyrýdyń negizgi quramdas bóligi», - dep túıindedi «Atameken» UKP basshysy Tımýr Qulybaev.