Pavlodarda ádebıet álemine esimi tanyla bastaǵan jas aqyn Elaman Qabdiláshimniń «Bolmysymnyń boıaýy» óleńder jınaǵyn jergilikti zııaly qaýymnyń taldaýy ótti.
Kitap Mádenıet jáne aqparat mınıstrliginiń «Jańa Qazaqstannyń ádebı-tanymdyq panoramasy» baǵyty boıynsha 2025 jyly jaryq kórgen. Avtordyń Qaraǵandy oblysyna jasaǵan shyǵarmashylyq saparynyń jemisi. Aqyn bul jınaqta óziniń oıyn, sezimin, tanymyn, túsinigin, janyn dala dıdarymen, qala bederimen, tabıǵat kórinisimen astastyra jyrlaıdy.
Jazýshylar odaǵy oblystyq fılıalynyń tóraǵasy Serik Elikbaı Elamannyń shyǵarmashylyǵyna joǵary baǵa berip, onyń poezııasynan ishki qaıshylyq pen tereń syrshyldyq baıqalatynyn atap ótti. Onyń pikirinshe, «Bolmysymnyń boıaýy» – Ertis-Baıan óńirindegi keıingi jas tolqyn arasyndaǵy shoqtyǵy bıik týyndy.
«Aqynnyń ishki áleminde únemi qaıshylyqtar bolyp jatatynyn ańǵaramyz. Bir óleńin oqyp otyryp, ony muńshyl dep uǵynsaq, endi bir jyrynan syrshyl aqyn dep qabyldaımyz. Ádebıettiń tarazysyna salsaq, aldyńǵy tolqyn keıingi tolqynǵa bóget bolmaýy kerek, al keıingi tolqyn aldyndaǵy aǵalarynan asyp túsýge tıis», deıdi qalamger.
Kitapty paraqtaı otyryp, aqynnyń poezııaǵa izdenispen kelgenin baıqaımyz. Ondaǵy «Álimhan men Sultanmahmut», «Nyqturaq», «Saıypqyran» poemalary kitap júgin salmaqtandyryp turǵandaı. Aqyn túısik tanymyn, óziniń ishki daýys yrǵaǵyna salyp, bolmys boıaýymen sýretteıdi. Adamnyń bolmysy – jeke bir álem. Ony áli kúnge deıin eshkim dóp basyp tanyǵan emes. Sol bir ishki álemniń qandaı bolatynyn ártúrli túspen keskindep, adamnyń qýanysh, ókinish, úmit, senim sekildi ishki ıirimderine tereń boılaıdy. Máselen, «Qasym úıinde. Ishime úńilý» atty sıkldik toptamasyna óz ishine kózben emes, «kóńilmen úńilgenin» kóremiz.
Elaman – ádebıetpen qatar, jýrnalıstik qyzmetti qatar alyp kele jatqan azamat. Birneshe kitaptyń avtory retinde Jazýshylar odaǵynyń músheligine qabyldandy. О́tken jyly «Shabyt» shyǵarmashyl jastar festıvaliniń laýreaty atandy.
Pavlodar oblysy