Premer-mınıstrdiń birinshi orynbasary Roman Sklıardyń tóraǵalyǵymen Energetıka mınıstrliginiń keńeıtilgen alqa otyrysy ótti. Oǵan Prezıdent Ákimshiligi, Úkimet apparaty ókilderi, Parlament depýtattary, Energetıka mınıstrliginiń basshylyǵy, ulttyq kompanııalar men vedomstvolyq baǵynysty uıymdar qatysty.
Roman Sklıar óz sózinde aldaǵy respýblıkalyq referendým memlekettik damý negizderin jańartýdyń mańyzdy kezeńin belgileıtinin atap ótti. Keń qoǵamdyq pikirtalas barysynda qalyptasqan negizgi zań jobasy memlekettik ınstıtýttardyń jaýapkershiliginiń joǵary standarttaryn belgileıdi.
«Energetıkalyq qaýipsizdik jáne tabıǵı resýrstardy utymdy paıdalaný salalyq mindetterge ǵana emes, sonymen qatar el damýynyń jańa konstıtýsııalyq modeliniń elementterine aınalyp keledi. Bul jaǵdaıda negizinen shıkizat modelinen tereń óńdeýge jáne joǵary qosylǵan qundy qurýǵa kóshý qajet», dedi R.Sklıar.
Roman Sklıar energetıka jáne munaı-gaz salasyndaǵy jumystyń basym baǵyttaryn belgiledi. Negizgi mindetter – geologııalyq barlaýdy damytý, kómirsýtekterdiń resýrstyq bazasyn tolyqtyrý, otandyq quramnyń úlesin ulǵaıtý, sondaı-aq munaı óńdeýdi kúsheıtý. Osyǵan baılanysty jańa munaı óńdeý zaýyty (MО́Z) qurylysynyń tehnıkalyq-ekonomıkalyq negizdemesin ázirleýge jáne jumys istep turǵan zaýyttardy keńeıtýge kirisý mindetteldi.
Atyraý oblysynda polıetılen zaýytyn salý, Pavlodarda alkılat óndirý jónindegi jobalar, sondaı-aq qaıta óńdeý men energetıkalyq táýelsizdiktiń ornyqty ósýin qamtamasyz etý úshin «Munaı-gaz-hımııa ónerkásibi týraly» zań jobasyn qabyldaý erekshe baqylaýda tur.
Energııalyq resýrstarǵa artyp kele jatqan suranysty jabý maqsatynda bıyl qýattylyǵy 1 mlrd tekshe metr bolatyn Qashaǵandaǵy MО́Z-di iske qosý, Jańaózendegi MО́Z qurylysyn 2027 jyldyń sońyna deıin aıaqtaý jáne «Beıneý – Bozoı – Shymkent» gaz qubyrynyń ekinshi jelisiniń júzege asyrylýyn qadaǵalaý mindeti qoıyldy.
Sondaı-aq Túrkistandaǵy bý-gaz qondyrǵysy jobalaryn aıaqtaýdy, Almatydaǵy JEO-2 men JEO-3-ti jańǵyrtýdy, sondaı-aq Batys energetıkalyq aımaǵyn eldiń biryńǵaı elektr energetıkalyq júıesimen biriktirýdi qosa alǵanda, jańa generasııalaýshy qýattardy jedel engizýge jáne jumys istep turǵan stansalardy jańǵyrtýǵa basa nazar aýdaryldy.
Kómir generasııasyn damytý, energııa nysandarynyń sıfrlyq egizderin engizý arqyly salany transformasııalaý, munaı bazalaryn munaı ónimderiniń kóleńkeli aınalymyn boldyrmaý maqsatynda biryńǵaı júıege ıntegrasııalaı otyryp, esepteý aspaptarymen jaraqtandyrý jónindegi Ulttyq jobaǵa erekshe mán berildi.
Jıyndy qorytyndylaı kele Roman Sklıar Energetıka mınıstrligi kúsh-jigerdi eldiń energetıkalyq táýelsizdigin qamtamasyz etýge, ınvestısııalyq jobalardyń júzege asyrylýyn qatań baqylaý qajettiligine jumyldyrýy qajet ekenin atap ótti. О́ıtkeni otyn-energetıkalyq keshendi damytý – memlekettiń jańa ekonomıkalyq úlgisiniń negizi sanalady.