Jeksenbi kúni О́zbekstanda ótken prezıdenttik saılaýda premer-mınıstr Shavkat Mırzııoev 88,61% daýyspen jeńiske jetti. Ol О́zbekstannyń Lıberal-demokratııalyq partııasy atynan saılaýǵa túsken bolatyn.
Saılaýǵa Shavkat Mırzııoevten basqa taǵy úsh kandıdat qatysty. Parlamenttiń tómengi palatasynyń vıse-spıkeri Sarvar Otamýradov (Ulttyq-demokratııalyq partııa), Narıman Ýmarov (Sosıal-demokratııalyq «Adolat» partııasy) jáne Hotamjon Ketmonov (О́zbekstannyń Halyqtyq-demokratııalyq partııasy).
Úmitkerlerdiń saılaý aldyndaǵy baǵdarlamalary bir-birine uqsas boldy. Barlyǵy tuńǵysh prezıdent Islam Karımovtiń saıasatyn jalǵastyrýdy, kórshilermen qarym-qatynasty damytýdy, turǵyndardy jumyspen qamtýdy usyndy. Degenmen, sarapshylardyń kóbi prezıdent mindetin atqarýshy ári premer-mınıstr Shavkat Mırzııoevtiń jeńetinine senimdi boldy. Mırzııoev tuńǵysh prezıdent Islam Karımovtiń baǵytyn jalǵastyrýdy negizgi urany etip aldy. Saılaý aldyndaǵy naýqan beıbit ótti. Joǵary bıliktegi yqpaldy saıasatkerlerdiń bir kandıdatty qoldaýǵa keliskeni jáne onyń 2003 jyldan beri úkimetti úzdiksiz basqaryp kele jatqan Shavkat Mırzııoev ekeni ańǵarylǵan edi.
Halyq aldyndaǵy bedelin kóterý úshin negizgi úmitkerdiń birqatar utymdy qadamdar jasaǵanyn aıta ketý kerek. Bir kezderi sahnadan shettetilgen óner adamdarynyń qaıtadan kórermen aldyna shyǵýyna múmkindik berdi. Kórshi eldermen qarym-qatynasty jaqsartýdy qolǵa aldy. Sybaılas jemqorlyqpen kúresti kúsheıtý, bıznesti tirkeýdi ońaılatý sharalaryn bastady. Sonymen qatar, valıýta aıyrbastaý tártibin jeńildetýdi usyndy. О́zbekstanda jeke adamdardyń valıýtany erkin aıyrbastaýyna ruqsat joq. Bul – turǵyndar úshin eń unamsyz tártipterdiń biri.
Sarapshylar Mırzııoevti aımaqtaǵy kórshi elder lıderleri, onyń ishinde Qazaqstan jáne Reseı prezıdentteri qoldap otyrǵanyn aıtady. Bul pikir negizsiz emes. Nursultan Nazarbaev ózbek halqyna kóńil aıtý úshin baýyrlas elge arnaıy saparmen bardy. Mırzııoevpen jeke kezdesip, qıyn kezeńde qazaq halqynyń ózbektermen birge ekenin aıtty. Odan keıin de ózbek basshysymen telefon arqyly sóılesti. Al keshe Shavkat Mırzııoevti О́zbekstannyń prezıdenti bolyp saılanýymen alǵash quttyqtaǵandardyń biri Qazaqstan basshysy boldy.
Ortalyq Azııadaǵy elderdiń barlyǵymen shekaralasatyn, 32 mıllıonǵa jýyq turǵyny bar О́zbekstan aımaqtaǵy mańyzdy el – Qazaqstannyń strategııalyq áriptesteri qatarynan. Alaıda, sońǵy jyldary О́zbekstan ekonomıkasy daǵdarysty bastan keship otyr. Ekonomıkany saýyqtyrý, turǵyndardyń turmys deńgeıin kóterý, ol úshin shetel ınvestısııasyn kóptep tartý – jańa lıder aldyndaǵy qazirgi negizgi mindetterdiń biri.
Erjan ÁBDIRAMAN,
«Egemen Qazaqstan»