Jambyl oblysynyń «Araıstroımarket-2003» kompanııasy Keńestik kezde bastalǵan kópir qurylysyn aıaqtaýǵa bel býyp otyr, dep habarlaıdy QazAqparat.
Qurylysy 1987 jyly bastalǵan nysannyń jobalyq quny 1,8 mıllıard teńgeni quraıdy. 2016 jyldyń aıaǵynda qaıta jandanǵan qurylysty 2018 jyldyń qyrkúıek aıynda aıaqtaý josparlanyp otyr. Merdiger kompanııa «Araıstroımarket-2003» JShS óńirde áleýmettik nysandardy, ǵımarattardy turǵyzatyn, avtokólik joldaryn salatyn, asfaltbeton shyǵaratyn kópsalaly qurylys kompanııasy retinde tanymal. Dál osy jambyldyq seriktestik Qazaqstanda alǵash ret jobalyq qýaty jylyna 250 myń seksııa bolatyn allıýmınıı jáne bımetall radıatorlaryn óndirýdi bastady. Onyń quny 1 mıllıon dollardan asatyn. Odan bólek, kompanııa Tarazda jeke bilim berý keshenin ashty - «Injý-Taraz» balabaqsha-mektebinde 600-den astam bala oqyp jatyr. «Araıstroımarket-2003» JShS basshylyǵynyń habarlaýynsha, «Qumshaǵyl» jáne «Qıyr Qarasý» turǵyn úı alaptaryn jalǵaıtyn kópirdiń uzyndyǵy 315 metr jáne eni 28 metr bolmaq. Qurylys jumystaryna 30 adam jáne 40 tehnıka jumyldyryldy. Kompanııa maqsatty túrde tek qana otandyq óndiristiń materıaldaryn paıdalanýda. Taraz ákimdiginiń aıtýynsha, bolashaqta «Qumshaǵyl» jáne «Qıyr Qarasý» turǵyn úı alaptary aýmaǵynda barlyq ınfraqurylymy bar jeke úıler qurylysyna 250 gektar jer bólinedi. Munda 1 104 jer ýchaskesi bolady, 2 ga aýmaqta 280 oryndyq balabaqsha, 3,6 ga jerge 600 oryndyq mektep, emhana jáne ózge de áleýmettik, mádenı jáne mádenı turmystyq nysandar turǵyzylady.