Bul kúnderi Almatyny kıno álemi áldılep tur. «Eýrazııa» kınofestıvali – sońǵy jyldary túsirilgen kıno týyndylardyń halyqaralyq báıgesi ǵana emes, festıval men festıval arasynda tyndyrylǵan tirlikterge esep beretin de kez.
Sonymen VII halyqaralyq «Eýrazııa» kınofestıvaliniń sheńberinde Sh.Aımanov atyndaǵy «Qazaqfılm» kınostýdııasynda «Qazaqstan kıno ensıklopedııasynyń» tusaýkeser rásimi bolyp ótti. Bul aıtýly sharaǵa otandyq kınematografııanyń damýyna aıtarlyqtaı úles qosqan óner sańlaqtary da ortaqtasty.
Ulttyq kınematografııanyń keshegisi men búgingisin túgendeıtin kitaptyń avtory – tarıhshy-jýrnalıst, Kınematografıster odaǵynyń keńesshisi Tumar Smaıylova. Atalmysh ensıklopedııa Kınematografıster odaǵynyń qoldaýymen «Polıgrafkombınatta» 2000 danamen basylyp shyǵypty.
Aty aıtyp turǵandaı, kitapta kıno maıtalmandarynyń ómirbaıandary, qazaq kınosyna qatysty túrli derekter men málimetter toptastyrylǵan.
Kópten kútken kitaptyń tusaýkeserinde Sh.Aımanov atyndaǵy «Qazaqfılm» kınostýdııasy» AQ prezıdenti Ermek Amanshaev:
– On jyldyń ishinde jaryq kórgen úsh kitaptyń sońǵysy búgin, mine, oqyrmandar nazaryna usynylyp otyr. Aldymen «Kınospravochnık» dep atalatyn kitap 2000 jyly jaryq kórse, «Kto est kto» kitaby 2003 jyly shyqqan edi. «Qazaqstan kınosy» degen ortaq atpen ár jyldary shyqqan osy eńbekterdi shyn máninde trılogııa dep aıtýǵa bolady, – dedi.
Amanshaevtyń aıtýynsha, Qazaqstan kıno ensıklopedııasy – qarapaıym oqyrmanǵa ǵana emes, kıno salasynyń myńdaǵan mamandaryna paıdaly qural da bola alady.
Almaty.