Sońǵy qońyraý bastalǵan kezdegi úsh tolqyn urpaqtyń: ata-analar men ustazdardyń, oqýshylardyń júzderindegi alaýlaǵan shattyqty, kózderindegi shýaqty nurdy, kóńilderindegi alaburtqan sezimdi kórgende, kimniń de bolsa jan dúnıesi tolqymaı tura almaıdy. Ásirese, táýelsiz elimizdiń Ánuranyn aıtqanda, sarbazdaı sap túzep turǵan oqýshylar, onyń ishinde bastaýysh synyp búldirshinderi oń qoldaryn júrek tusyna qoıyp, Ánurannyń sózi men áýenin ásem únderimen áýelete aıtqanda, zal ishin keremet bir tolqyn kernep ketkeni anyq. Osydan bolý kerek, atam qazaqtyń qýanyshty sátti «Úlkeniniń myńyna bergenshe, balanyń birine ber» deıtini. Tipti, sol tusta «Baǵalaı bilý, eń áýeli ózimizdi qadirleı bilý» (A.Baıtursynuly) úlgisin ul men qyz aıqyn kórsetip turdy. Bıyl elimiz boıynsha 3 mıllıonǵa taıaý oqýshy sabaqtaryn aıaqtasa, olardyń 136 269-y túlekter bolyp sanalady. Bulardyń ishinde qazaq mektepterin − 90 804, orys mektepterin − 39 334, ózge tildi mektepterdi 6131 bala bitiredi eken. Osylardyń ishinde eń kóp bitirýshilerdiń úlesine kelsek, 34 227 Ońtústik Qazaqstan oblysynyń, 14 684 túlek Almaty oblysynyń, 10 043 Almaty qalasynyń úlesine tıip otyr. «Altyn belgige» úmitkerlerdiń sany 6280 túlekti quraıdy. Onyń 4878-i – qazaq tildi, 1288 – orys tildi, 114 − basqa ult ókilderiniń tilinde bilim alǵan úmitkerler eken. Sol sekildi ústimizdegi jyly 233 myń 622 oqýshy 9-synypty aıaqtapty. Elimiz boıynsha mektep bitirýshilerge attestat tapsyrý rásimi maýsym aıynyń 10-12-si arasynda ótetinin eske sala ketsek deımiz. Elordadaǵy Raıymbek batyr atyndaǵy №50 «Qazǵarysh» mektep lıseıindegi «Syńǵyrla, sońǵy qońyraý!» atty merekelik saltanatqa eki myńǵa taıaý oqýshy qatysty. Mektep túlekteri bilim kiltin 10-synyp oqýshylaryna tapsyrdy. Budan keıin Bilim jáne ǵylym mınıstrliginiń ókili Raýshan Muqysheva sóz alyp, qaýmalaǵan jurtty quttyqtady. Túlekter synyp jetekshilerine gúl shoqtaryn usynyp, alǵystaryn aıtsa, ustazdary 11 jyl boıy bilim berip, bozbala men boıjetkender qataryna bet alǵan shákirtterine sát sapar tilep, qımaı qoshtasatyndaryn tilge tıek etti. Sol sekildi ata-analar atynan sóz alǵan azamattar da ustazdar eńbegin joǵary baǵalap, qashanda altyn uıadaǵy bilim men tárbıe aldaǵy ýaqytta óz jemisin beretinine sendirdi. Kúmis qońyraýdy 1-synyptyń 4 oqýshysy soǵyp, olardyń qolynan túlekter alyp, shattyqtyń qushaǵynda urpaqtar sabaqtastyǵynyń ádemi kórinisin jurttyń kóz aldynan ótkizdi. Osy bir sáttegi án áýezi qalyqtap, ol qoshtasý valsine ulasty. Mektep dırektory Roza Bolataevanyń aıtýynsha, bilim uıasyn 80-ge tarta túlek bitirip jatyr eken. Bıylǵy jylǵy sońǵy qońyraýdyń ereksheligi, sanaýly kúnderden keıin ashylatyn EKSPO-2017 kórmesine tuspa-tus kelýinde ekenin tilge tıek etip, osyǵan atsalysý árbir qazaqstandyqtyń paryzy degendi jetkizdi. Ol sonymen birge, mekteptegi jetistikterdi de jan-jaqty aıta kelip, oqýshylardy yntalandyrý maqsatynda «Úrker» syılyǵy belgilengenin, sony 8 oqýshyǵa tapsyryp turyp, bul úrdis aldaǵy ýaqytta jalǵasa beretinin nazarǵa saldy. Bilim ordasy ótken jyly «Úzdik mektep» atansa, jaqynda muǵalimderdiń sabaq berý ádisi boıynsha Astana ákimdigi ótkizgen «Úzdik muǵalim-2017» baıqaýynda qazaq tili pániniń ustazy Ulbolsyn Esilbaeva birinshi oryndy jeńip alyp, 1 mln 654 myń teńge syıaqyǵa ıe bolypty. Munymen qatar, respýblıkalyq ustazdar báıgesine joldamaǵa qoly jetkenin de aıta ketsek deımiz. Sonymen sońǵy qońyraýdyń jalǵasy oqýshylardyń jazǵy demalysyna, túlekterdiń synaq tapsyrýyna, joǵary oqý ornyna túsý armanyna ulasatyn bolady.
Súleımen MÁMET, Sýretti túsirgen Erlan OMAROV, «Egemen Qazaqstan»