Fýtbol Fýtboldan Qazaqstan kýbogy jolyndaǵy jarystyń birinshi jartylaı fınaldyq oıyndary ótti. Shymkenttiń «Ordabasy» klýby óz alańynda «Qaıratpen» 0:0 esebimen teń tústi. Bul kezdesýde «Qaırattyń» qorǵaýshysy Eldos Ahmetov óreskel oıyny úshin 74-mınýtta alańnan qýyldy. Al óz alańynda «Atyraýdy» qabyldaǵan Qaraǵandynyń «Shahteri» 1:0 esebimen jeńiske jetti. Oıyn taǵdyryn sheshken jalǵyz goldy matchtyń 25-mınýtynda «kenshilerdiń» shabýylshysy Dáýrenbek Tájimbetov soqty. Jartylaı fınaldyń qarymta oıyndary 21 maýsym kúni ótedi. Velosport Mamyr aıynyń 28-i kúni Almatyda dástúrli velosherý ótedi. Osymen besinshi ret uıymdastyrylyp otyrǵan bul sporttyq sharada veloshabandozdar 10 shaqyrym qashyqtyq boıynsha kúsh synaıdy. Sherý ál-Farabı dańǵylynan bastalyp, M.Gorkıı atyndaǵy demalys saıabaǵynda máresine jetedi. Velosherý aıaqtalǵan soń shaǵyn konsert uıymdastyrylyp, jankúıerler arasynda baǵaly syılyqtar oınatylady. Shógen Keshe Germanııanyń Mıýnhen qalasynda shógen sportynan «Munich Gold Cup-2017» halyqaralyq týrnıri bastaldy. Álemniń eń myqty shógenshileri baq synaıtyn bul básekede Qazaqstannan qos komanda – «Astana Polo Club» jáne «Almaty Polo Club» ujymdary óner kórsetedi. Avtorallı Mańǵystaýda «Rallı Qazaqstan-2017» týrnıriniń tórtinshi kezeńi aıaqtaldy. FIA Halyqaralyq avtomobıl federasııasy reıdiniń rallıden Álem kýbogynyń besinshi kezeńine jatatyn bul jarysta Qatardyń Nasser ál-Attııa bastaǵan ekıpajy birinshi keldi. Aktau Motorsport komandasynyń ekıpajy atalǵan kezeńde táýir óner kórsetip, óziniń osy týrnırdegi jalpy nátıjesin jaqsartyp aldy.
Ázirlegen Qaırat JÚNISULY