«Qazaqstannyń kıeli jerleriniń geografııasy» − Elbasynyń Qoǵamdyq sanany jańǵyrtý baǵdarlamasy aıasynda jasalǵan aýqymdy joba. Jobany úılestirýshi – Mádenıet jáne sport mınıstrligi bolǵanda, ony oryndaýshy – Ulttyq mýzeıdiń janynan qurylǵan «Kıeli Qazaqstan» ǵylymı-zertteý ortalyǵy. Jobany júzege asyrý úshin ortalyqta Hangeldi Ábjanov, Zeınolla Samashev, Karl Baıpaqov, Aleksandr Garkaves, Merýert Ábýseıitova syndy ár salanyń bilikti ǵalymdarynan qurylǵan jumys toby jasaqtalǵanyn atap ótý qajet. Forým barysynda Mádenıet jáne sport mınıstri Arystanbek Muhamedıuly jobany júzege asyrý barysynda osy ýaqytqa deıin elimiz boıynsha kıeli jer retinde 100-den asa nysannyń tizimge alynǵanyn, onyń ishinde IýNESKO-nyń Búkilálemdik mádenı jáne tabıǵı muralar tizimine engen tarıhı jáne mádenı eskertkishterdiń bar ekenin atap ótti. Mınıstrdiń sózinen uqqanymyz jobanyń josparyna sáıkes «Kıeli jerler geografııasy» retinde 500-ge jýyq nysan belgilenbek. Iаǵnı, arheologııalyq jáne sáýlet eskertkishteri, erekshe qurmetteletin dinı nysandar, tarıhı tulǵalar men saıası oqıǵalarǵa baılanysty kıeli jerlerdi kartaǵa kirgizý kózdelýde. Sol úshin aımaqtarmen birlesken aqparat jınaý jumysy júrip jatyr. «Kıeli Qazaqstan» ǵylymı-zertteý ortalyǵynyń dırektory Berik Ábdiǵalıev jıyn barysynda jobanyń tujyrymdamasy jasalǵanyn atap ótti. Ol boıynsha eń aldymen kıeli nysandardy irikteýdiń ólshemderi bolýy tıis, sondaı-aq, olardy jobaǵa kirgizý úshin ádisteme jasalý qajet. «Qazaqstannyń kıeli jerleri» jobasy – dinı joba emes. Sondaı-aq, taza ǵylymı joba dep te aıtýǵa kelmeıdi. О́ıtkeni, jobanyń saıası jaǵy da bar. Menińshe, sanamyzdy damytý úshin, qazaqstandyq biregeılikti qalyptastyrý úshin jumys atqarý kerek. Bul bizge syrttan kelip jatqan jat ıdeologııalarǵa qalqan bolyp turý úshin qajet, dedi ol. B.Ábdiǵalıev tizimge engen eskertkishterdiń nemese basqa da nysandardyń otandastarymyzdyń rýhanı dúnıesin baıytýǵa qyzmet etý kerektigine mán berdi. Ol úshin jobany júzege asyrý barysynda nasıhat jumystaryna kóńil bólinetinin, onyń ishinde kitaptar shyǵarylyp, merzimdi baspasózderde materıaldar jarııalanyp, beınerolıkter túsiriletinin atap ótti. Sondaı-aq, búkil Qazaqstan boıynsha ekspedısııalar uıymdastyrylmaq. Aıta keteıik, «Qazaqstannyń kıeli jerleriniń geografııasy» jobasyn júzege asyrýdyń negizgi qaǵıdalarynyń biri – keń kólemdi keshendi zertteý júrgizý, materıal jınaqtaý. Bıyl elimizde alty baǵyt (Ońtústik, Soltústik, Shyǵys, Batys, Ortalyq jáne Ońtústik-Shyǵys) boıynsha ǵylymı-zertteý jáne dala ekspedısııalaryn ótkizý josparlanǵan.
Aıgúl SEIILOVA, «Egemen Qazaqstan»
Sýretti túsirgen Erlan OMAROV,