«QazAvtoJol» UK AQ jol qozǵalysy qaýipsizdigin arttyrýǵa baǵyttalǵan ınnovasııalyq tehnologııalardy engizýdi jalǵastyryp jatyr. Búginde eldiń aqyly avtomobıl joldarynda lazerlik vızýaldy baǵyttaý júıelerin ornatý negizgi sheshimderdiń birine aınalyp otyr, dep habarlaıdy Egemen.kz.
Jobany «Aqyly avtomobıl joldarynyń dıreksııasy» fılıaly júzege asyryp jatyr. Jumystar respýblıkalyq mańyzy bar 22 ýchaskede júrgizilýde. Olardyń qatarynda Astana – Shýchınsk, Almaty – Qorǵas, Shymkent – Taraz, Oral – Reseı Federasııasynyń shekarasy sııaqty strategııalyq mańyzdy baǵyttar bar.
Jańa tehnologııa eń aldymen kóriný nasharlaǵan jaǵdaıda jáne túngi ýaqytta qaýipsizdikti arttyrýǵa baǵyttalǵan. Dál osy kezde adam faktorynyń róli kúsheıip, apat qaýpi arta túsedi.
Eldegi aqyly joldarda tólem merzimderi ózgerdi: Júrgizýshiler neni eskerýi kerek?
Lazerlik qondyrǵylar júrgizýshiniń kóz aldynan anyq jaryq syzyqtaryn proeksııalap, jol boıynda naqty vızýaldy baǵyt beredi. Bul júıe birneshe mańyzdy artyqshylyqqa ıe:
• kólik jyldamdyǵyn jáne qozǵalys traektorııasyn der kezinde túzetýge kómektesedi; • uzaq ári birkelki jol ýchaskelerinde júrgizýshiniń uıyqtap ketý qaýpin azaıtady; • zeıindi arttyrady jáne jol jaǵdaıyn jaqsyraq baqylaýǵa múmkindik beredi; • joldaǵy kórinisti qabyldaýdy jaqsartady.
Bul júıe ásirese uzaq trassalarda tıimdi, sebebi mundaı jerlerde dástúrli jol belgileri men tańbalar keıde jetkilikti deńgeıde kórinbeýi múmkin.
Halyqaralyq tájirıbe mundaı tehnologııalardyń tıimdi ekenin kórsetip otyr. Sheteldik pılottyq jobalarǵa sáıkes, lazerlik sıgnaldarǵa júrgizýshilerdiń reaksııasy dástúrli belgilerge qaraǵanda áldeqaıda jyldam. Al keıbir ýchaskelerde jol-kólik oqıǵalarynyń sany 40-50 paıyzǵa deıin azaıǵan.
Aqyly joldar: Elimizde qaı baǵyttarda tólem alynady?
Qazaqstandaǵy aqyly jol paıdalanýshylary da jańa júıege oń baǵasyn berdi. Kólik júrgizýshileri túngi ýaqytta joldy baǵdarlaý jeńildegenin, qozǵalys qaýipsizdigi artqanyn jáne jalpy júrgizý yńǵaılylyǵy jaqsarǵanyn atap ótti.
«QazAvtoJol» ulttyq kompanııasy ıntellektýaldy kólik ınfraqurylymyn damytýǵa basymdyq berip otyr. Lazerlik júıelerdi engizý – tek tehnologııalyq jańalyq qana emes, sonymen qatar adam ómirin saqtaýǵa qosylǵan mańyzdy úles jáne zamanaýı qaýipsiz júrgizý mádenıetin qalyptastyrýǵa baǵyttalǵan qadam.