Qazaqstannyń aýyr atletıka quramasy jasóspirimder arasyndaǵy álem chempıonatynda bes medal jeńip aldy. Jarys Ismaılııa qalasynda ótti. Barlyq júlde 88 kelige deıingi salmaq dárejesinde tirkeldi, dep habarlaıdy Egemen.kz.
Erasyl Saýlebekov serpe kóterýde 199 kelini baǵyndyryp, altyn medal jeńip aldy. Sondaı-aq ol qossaıys qorytyndysy boıynsha 356 keli nátıjemen kúmis júldege ıe boldy.
Alıhan Áskerbaı julqa kóterýde kúmis, al serpe kóterý men qossaıysta qola medal enshiledi.
Al 65 kelige deıingi salmaqta Beıbarys Erseıt julqa kóterýde 131 kelini kóterip, jasóspirimder arasyndaǵy álem rekordyn jańartty. Bul – qazaqstandyq aýyr atletıka úshin tarıhı jetistik.
Eske salaıyq, stend atýdan Almatyda ótken álem kýbogi kezeńinde Ásem Orynbaı jeńis tuǵyrynyń eń bıik satysyna kóterilip, áıelder arasyndaǵy «skıt» jattyǵýynda top jarǵan bolatyn.
Qytaıdyń Ordos qalasynda ótip jatqan Azııa chempıonatynda Qazaqstan dzıýdoshylary kúmis medal oljalasa, Tashkent qalasynda ótken jasóspirimder arasyndaǵy taekvondo boıynsha álem chempıonatynda Qazaqstan quramasy eki qola medalǵa qol jetkizdi.