Memleket basshysy «Qazaqstan Respýblıkasynyń orta bilim berý júıesine jasandy ıntellektini endirý jónindegi sharalar týraly» Jarlyqqa qol qoıdy, dep habarlaıdy Egemen.kz.
Jarlyqtyń negizgi maqsaty – jasandy ıntellekt jedel damyp kele jatqan kezeńde Qazaqstan Respýblıkasynyń órkendeýin qamtamasyz etip, adamı kapıtaldy ilgeriletýge úles qosatyn zamanaýı, ınnovasııalyq bilim berý júıesin qalyptastyrýǵa jaǵdaı jasaý.
Jarlyqqa sáıkes Qazaqstan Respýblıkasynyń Úkimeti 2026 jyldyń 1 shildesine deıin derbes oqytý tetigin, sıfrlyq ınfraqurylymdy, pedagog kadrlar daıarlaýdy, bilim alýshylardyń jeke málimetterin qorǵaýdy kózdeıtin Orta bilim berý júıesine jasandy ıntellektini engizýdiń 2026-2029 jyldarǵa arnalǵan keshendi is-sharalar josparyn bekitedi.
Jarlyqta Jasandy ıntellektini damytý jónindegi keńestiń múshesi Lı Kaı-Fýdiń usynymdaryn jumys barysynda qoldaný qarastyrylǵan. Úkimet qala men aýyl mektepteri arasynda bilim berý sapasynyń alshaqtyǵyn qysqartý maqsatynda 2026 jyldyń 1 maýsymyna deıin orta bilim berý salasyndaǵy pılottyq jobany iske asyrý, ony odan ári keńinen taratý jóninde naqty usynystar engizýge tıis.
2026 jyldyń 1 tamyzyna deıin pılottyq jobany iske asyrý aıasynda mektepter tehnıkalyq turǵydan jaraqtandyrylady, sonyń ishinde turaqty, jyldamdyǵy joǵary ınternetpen qamtamasyz etiledi.
2026 jyldyń 1 qyrkúıegine deıin orta bilim berý júıesinde jasandy ıntellektini qoldaný standarttary bekitiledi.
Sondaı-aq 2026 jyldyń 1 qyrkúıegine deıin pedagogterdiń kásibı turǵydan úzdiksiz damýyn kózdeı otyryp, olardyń qyzmetine nuqsan keltirmeı ári almastyrmaı jasandy ıntellekt tehnologııalaryn bilim berý prosesinde qosymsha tıimdi qural retinde paıdalanýdy qamtamasyz etetin sharalar jospary qabyldanady.