Otyrysqa komıssııa músheleri – respýblıkalyq buqaralyq aqparat quraldarynyń, shyǵarmashylyq birlestikterdiń, jýrnalısterdiń qoǵamdyq uıymdarynyń jáne múddeli memlekettik organdardyń ókilderi qatysty. Basqosýda Memlekettik hatshy Qazaqstannyń memlekettiligin nyǵaıtýdaǵy buqaralyq aqparat quraldarynyń mańyzdy rólin atap ótti.
«Búgingi kezdesýimiz qoǵam ómiriniń barlyq salasyn jańǵyrtýǵa baǵyttalǵan ınstıtýttyq reformalardyń tereńdeı túsken jaýapty kezeńinde ótip otyr. Memleket basshysy belgilegen Qazaqstannyń ozyq damyǵan 30 eldiń qataryna qosylý jónindegi strategııalyq mindetteri otandyq BAQ-qa degen zor suranys týdyryp, erekshe ról atqarýdy talap etedi. Jýrnalısterdiń kásibı merekesine oraı, jyl saıynǵy aqparat salasynyń úzdikterin belgileımiz. Buqaralyq aqparat quraldary salasyndaǵy Prezıdent syılyǵyn berý, grantyn tapsyrý jáne Alǵysyn jarııalaý – baspasóz ókilderi asyǵa kútetin dástúrli is-sharamyz. Elbasynyń jýrnalısterge arnalǵan syılyǵy men granty alǵash ret 1997 jyly berildi. Sodan beri, mine, 21-ret ótkizilgeli otyr», – dedi G.Ábdiqalyqova.
Memlekettik hatshy, sondaı-aq, aqparattyq qoldaý memlekettik saıasatty jáne el ishindegi reformalar baǵytyn tıimdi iske asyrýdyń mańyzdy talaptarynyń biri bolyp tabylatynyna toqtaldy.
«Jahandaný prosesi beleń alǵan qazirgi zamanda baspasózdiń básekege qabiletti bolýy – mańyzdy mindetterdiń biri. Sondyqtan Memleket basshysy Nursultan Nazarbaev BAQ ókilderiniń, buqaralyq aqparat quraldarynyń jumysyna asa kóńil bóledi jáne arnaıy qoldaý bildirip otyrady. Osyǵan baılanysty memlekettik syılyq pen granttar belgilengen. Bıyl Elbasynyń «Bolashaqqa baǵdar: rýhanı jańǵyrý» atty tarıhı maqalasy jarııalandy. Qoǵamdyq sanany damytý men rýhanı jańǵyrýdy iske asyrýda BAQ ókilderiniń de róli orasan zor», – dedi G.Ábdiqalyqova.
Memlekettik hatshy taıaý kúnderi Astanada EKSPO-2017 kórmesi óz jumysyn bastaıtyndyǵyn, onyń jumysyn kórsetýde, nasıhattaýda BAQ ókilderin úlken jumys kútip turǵanyn tilge tıek etti. Sondaı-aq, bıylǵy Qoǵamdyq komıssııanyń otyrysynda jýrnalıstik materıaldar deńgeıiniń joǵary ekeni aıtylyp, Qazaqstan damýynyń mańyzdy qoǵamdyq-saıası jáne áleýmettik-ekonomıkalyq aspektilerin jarııa etýdegi medıa qoǵamdastyǵy ókilderi úlesiniń zor ekendigi nazardan tys qalmady.
Talqylaý qorytyndysy boıynsha Qoǵamdyq komıssııa ashyq daýys berý arqyly, BAQ salasyndaǵy prezıdenttik syılyqtardy tapsyrý erejesine sáıkes, BAQ ókilderine eki syılyq jáne eki grant bólý, tórt shyǵarmashylyq ujymǵa Prezıdent Alǵysyn jarııalaý jóninde Memleket basshysyna usynym jasaýǵa biraýyzdan qaýly etti.
Nurlybek DOSYBAI, «Egemen Qazaqstan»