Pavılonda Reseıdiń energetıkalyq áleýeti, atom salasynda jetken jetistikteri, gıdroenergetıkadaǵy tyń serpilisi kórsetiledi.
«Mundaı aýqymdy pavılondy tanystyryp turǵanyma qýanyshtymyn jáne bolashaqtyń energııasyn kórsetýde reseılik pavılonnyń aldyńǵy oryndardan kórinerine senimdimin. Barlyq kelýshiler túrli teńizderdiń arasynda, Soltústik teńiz joly boıynda ornalasqan Reseıdiń óz tabıǵı artyqshylyqtaryn qoldana otyryp, bolashaq energııanyń ınnovasııalyq damýyna qadam basýyn kóre alady», - dedi Reseı Federasııasynyń Qazaqstandaǵy Tótenshe jáne О́kiletti elshisi Mıhaıl Bocharnıkov pavılonnyń ashylý rásiminde.
Bir qyzyǵy, pavılonnyń ashylý saltanatynda ádettegideı lenta qııý rásimi bolmady. Pavılonnyń bas komıssary Georgıı Kalamanov pen «EKSPO-2017» halyqaralyq mamandandyrylǵan kórmesiniń komıssary Rápil Joshybaev jáne Reseı Federasııasynyń Qazaqstandaǵy elshisi Mıhaıl Bocharnıkov suıyq azotpen muz bop qatyrylǵan lentany balǵamen jardy.
Pavılonǵa kirgen kórme qonaqtary máńgilik muzdy meken - Arktıkaǵa tap bolǵandaı áser alady. Ǵımarattyń qabyrǵalary toń basqan muz túrinde jabdyqtalǵan jáne ondaǵy sáýleler Arktıka tabıǵatyna ǵana tán Soltústik shuǵyla qubylysyn beıneleıdi.
Ekspozısııanyń basty jańalyǵy - Arktıkadan, ǵalamshardyń «eń tóbesinen» jetkizilgen muz seńi boldy. Qalyńdyǵy 4 metrdi quraıtyn muz seńi eki jylda túzilgen jáne arnaıy konteınerler arqyly Astanaǵa jetkizilgen.
«Biz «EKSPO-2017» «Bolashaqtyń energııasy» taqyrybyn Reseı Arktıkasy biregeı aımaǵy arqyly kórsetemiz. Dál osy aımaqta Reseıdiń balamaly energetıkasyn damytýdyń bolashaǵy zor. Budan bólek, Arktıkada paıdaly qazbalar da kóp», - dedi reseılik seksııanyń bas komıssary Georgıı Kalamanov.
Sondaı-aq, Reseı pavılony ekologııa jylyna qoldaý bildirý maqsatynda, ósimdikter men janýarlar álemin qorǵaýǵa qatysty arnaıy ekspozısııa usynady. Kelýshiler «Arktıkanyń tabıǵı álemi», «Arktıkanyń sý astyndaǵy álemi. Qaırań», «Arktıkanyń ósimdikter men janýarlar álemi, «Muzdar» syndy dınamıkalyq vıdeo-ınstalıasııalardy tamashalaıdy jáne janýarlardyń sırep ketken túrlerin saqtaý týraly málimettermen tanysa alady.
2017 jyldyń 8 qyrkúıeginde EKSPO-daǵy Reseı kúni atalyp ótedi.