Shaqyrý bıletterine ıe bolǵandar qatarynda bilim, óner jáne sport salasynda úzdik nátıjelerge qol jetkizip, ınstıtýttyń qoǵamdyq ómirine belsene atsalysyp júrgen jastar bar.
Stýdenttermen kezdesý barysynda oqý ornynyń basshysy bilimgerlerdi oqý jylynyń aıaqtalýymen quttyqtap, álemdik tehnologııalyq úderiske zor úles qosatyn «EKSPO-2017» kórmesiniń máni men mańyzyna toqtaldy.
– Elorda tórindegi jahandaǵy ozyq oıly adamdardyń qatysýymen ótip jatqan kórme adamzat damýynyń jańa baǵyttaryn aıqyndamaq. Myńdaǵan otandastarymyz ben álemniń túkpir-túkpirinen kelip jatqan qonaqtar sońǵy ǵylymı jetistiktermen tanysýda. Bul is-sharalar memleketter arasyndaǵy ózara túsinistikti damytýǵa, ǵylym, bıznes jáne bilim arasyndaǵy tabysty is-qımylǵa, sonymen qatar Uly Dala mádenıetimen etene tanysýǵa zor septigin tıgizbek. Sizder «Bolashaqtyń energııasy» taqyrybymen ótip jatqan kórme kesheniniń nysandary men pavılondaryn aralap, ǵylymı progrestiń qalaı damyp jatqanyn tamashalaısyzdar. Kórip qana qoımaı, tehnologııalyq órleýdi jete zerdeleńizder, – dedi D.Qojamjarova.
О́z kezeginde stýdentter halyqaralyq kórmege barýǵa múmkindik jasap otyrǵan ınstıtýt basshylyǵyna izgi nıetin bildirip, is-sharanyń Qazaqstannyń ǵylymyn damytýǵa jáne ekonomıkamyzdy jańa beleske kóterýge septigin tıgizetinine senim bildirdi.