Ol qyzmet babyn jeke múddesine paıdalanyp, zań talaptaryn óreskel buzǵan. Atap aıtqanda, aýylsharýashylyq óndiristik kooperatıvin qurýǵa yqpal jasap, tıesili qarajatty ákesine, odan qaldy týǵan-týystaryna qyldaı etip bólip bergen. Osylaısha 3 mıllıon 96 myń teńge demeýqarjyny shúlen taratqandaı úlestirgen. Keıin tekseris nátıjesinde qarajat qaıtarylsa da, sheneýniktiń memlekettik qyzmetshi atyna kir keltirgen is-áreketine qatań baǵa berilip, laýazymynan shettetiletin boldy. Aqjar aýdandyq aýyl sharýashylyǵy bóliminiń basshysy Ábdijapar Qımanov asyl tuqymdy mal ósirýmen aınalysatyn fermerlerge sýbsıdııa berý týraly qujatqa eki ret qol qoıyp, bir jyldyń ishinde 1 mıllıon 800 myń teńgeni qoldaryna ustatyp jibergen. Ol shtatta mamandar jetispeıdi, jumys júktemesi kóp, sýbsıdııa alǵandaryn bilmedim dep san syltaý aıtqanymen, qyzmetine tolyq saı emes degen uıǵarym shyǵaryldy. Ýálıhanov aýdandyq aýylsharýashylyq bóliminiń jetekshisi Azamat Jaýarovqa da qyzmetine tolyq saı emestigi betine basyldy. Ol 13 sharýashylyqqa zańsyz sýbsıdııa bólgen. Jeńildikti sýbsıdııa, demeý qarjy bólýge, tóleýge baılanysty zańsyzdyqtardyń jıi kezdesýine qaraǵanda, tıisti oryndar tarapynan baqylaý men talaptyń bosańsyǵanyn ańǵarý qıyn emes. Al M.Jumabaev aýdany Vozvyshen aýyldyq okrýginiń ákimi Qaısar Ábishev mádenıet úıiniń shatyryn kúrdeli jóndeýden ótkizý úshin ashyq konkýrs ótkizý talabyn bile tura, lısenzııasy joq «Ýspeh SK» jeke kásipkerligimen memlekettik satyp alý jóninde kelisimshartqa otyrǵan. Osynyń saldarynan qurylys jumystary sapasyz júrgizilip, 200 myń teńge shyǵyn kelgen. Osy zańsyz áreketi úshin ol ákimshilik jaýapkershilikke tartylyp, 100 aılyq eseptik kórsetkish kóleminde aıyppul tartqan. Keńes músheleri oǵan qatań sógis jarııalady.
О́mir ESQALI, «Egemen Qazaqstan»
Soltústik Qazaqstan oblysy