Májilis spıkeri, «Amanat» partııasynyń tóraǵasy Erlan Qoshanov Kásipkerlik máseleleri jónindegi úılestirý keńesiniń keńeıtilgen otyrysynda partııa janynan Kásipkerler qanaty qurylǵanyn málimdedi. Is-sharaǵa myńdaǵan kompanııa men mıllıondaǵan adamdy biriktiretin bıznes-qoǵamdastyq pen iri salalyq qaýymdastyqtardyń ókilderi qatysty. Sondaı-aq otyrysqa partııanyń óńirlik fılıaldary beınekonferensbaılanys arqyly qosyldy.
Erlan Qoshanov sóziniń basynda keıingi jyldary Prezıdent jańa memlekettik modeldi dáıekti túrde qalyptastyryp otyrǵanyn atap ótti. Ol qýatty ekonomıkaǵa, ádildikke jáne jumys oryndaryn ashyp, ınvestısııa tartatyn, eldi alǵa jeteleıtin kásipkerlerdi naqty qoldaýǵa baǵyttalǵan. Referendýmda azamattar keńinen qoldaǵan jańa Konstıtýsııa osy baǵytty saıası ári qısyndy turǵyda bekitti. Bul rette partııa men bıznestiń ortaq maqsaty – Progressıvti ári Ádiletti Qazaqstan qurý. Sondyqtan «Amanat» bıznes ókilderimen kúsh biriktirip, el men onyń azamattarynyń ıgiligi jolynda birlesip jumys isteýge daıyn.
«Partııanyń tájirıbesi, áleýeti jáne jumys isteýge degen umtylysy bar. Biz – árdaıym Prezıdent saıasatynyń aldyńǵy shebindemiz. El tarıhyndaǵy mańyzdy kezeńderde saıası ınstıtýttardyń basyn biriktirip kelemiz. Belsendi azamattarǵa arnalǵan jumys alańdarymyz bar. Jastar qanaty men áıelder qanaty jumys isteıdi. Olar el aýmaǵynda ondaǵan myń adamdy biriktiredi. Bul – partııamyzdyń ózegin quraıtyn elektorat. Bıznes te partııany óz seriktesi retinde kórýi kerek. Bizge senim bildirip, munda olardyń daýysy estiletinine, máseleleri naqty qaralyp, sheshimin tabatynyna kóz jetkizýi qajet. Sondyqtan partııanyń jeke Kásipkerler qanatyn qurýdy usynamyn», dedi partııa tóraǵasy.
Erlan Qoshanov partııanyń bıznespen birlesken jumysynda eleýli tájirıbe jınaqtaǵanyn atap ótti. Bul baǵytta bıznestiń múddesin júıeli qorǵaý jáne kásipkerler qaýymdastyǵymen turaqty dıalog ornatý isinde tıimdi alańǵa aınalǵan partııa janyndaǵy Úılestirý keńesi mańyzdy ról atqarady. 30-dan asa otyrys ótkizilip, basqosýlarda naryqqa qol jetkizý men qarjylandyrýdan bastap, salyqtyq jáne ınfraqurylymdyq retteýge deıingi 190-ǵa jýyq másele qaraldy. Keńestiń tıimdi jumysyna Premer-mınıstrdiń orynbasary – Ulttyq ekonomıka mınıstri Serik Jumanǵarınniń teń tóraǵa retinde tikeleı qatysýy yqpal etip keledi.
О́ńirlerde de osyndaı partııalyq keńester belsendi jumys isteıdi. Jaqyn arada keńester jergilikti bıznestiń problemalyq máseleleriniń tizilimin qalyptastyryp, ákimdikter men barlyq múddeli memlekettik organnyń qatysýymen olardy júıeli túrde sheshýge kúsh salady. Qajet bolǵan jaǵdaıda bul máseleler respýblıkalyq deńgeıge shyǵarylady. Partııa óńirlik keńester jumysyna eń belsendi kásipkerlerdi tartady. Aldaǵy ýaqytta olar partııanyń kadrlyq rezervine engiziledi.
«Amanat» partııasy sondaı-aq bızneske qoldaý kórsetýdiń sıfrlyq quraldaryn kúsheıtip jatyr. «Ashyk Amanat» analıtıkalyq platforma iske qosylady. Bul servıs elimizdegi kásipkerlerdiń problemalyq máselelerin biriktirip, partııa, Úkimet jáne bıznes qaýymdastyǵy arasyndaǵy naqty ári tıimdi dıalogtiń quralyna aınalýǵa tıis.
Májilis tóraǵasy bıznes ókilderimen belsendi jumysty Májilistegi partııa fraksııasy júrgizip otyrǵanyn atap ótti. Parlamentte kópshilik daýysqa ıe fraksııa retinde kásipkerlikti qoldaýǵa, ashyqtyqty arttyrýǵa jáne ákimshilik kedergilerdi azaıtýǵa baǵyttalǵan zańdardy jetildirip, olardyń oryndalýyn baqylaıdy. Máselen, bıznes qaýymdastyqpen jáne «Atameken» UKP-men pándik dıalog jańa Salyq, Qurylys kodeksteri, memlekettik satyp alý týraly zań jobalaryn ázirleý kezinde quryldy.
Jańa Kásipkerler qanatynyń qyzmeti aıasynda bul ózara is-qımyl júıeli túrde kúsheıtiledi. Fraksııada bıznes salasyndaǵy belsendilermen turaqty baılanys ornatatyn jaýapty depýtattar bekitiledi. Olar kásipkerler bastamalaryn zańnamalyq tetikter men depýtattyq saýaldar arqyly ilgeriletip, zań jobalaryn ázirleý jónindegi jumys toptaryna bıznes ókilderin tartýmen aınalysady.
Otyrys barysynda Serik Jumanǵarın kásipkerlerdiń ótinishterimen jumys júıeli ózgeristerge alyp kelýge tıis ekenin atap ótti. Onyń aıtýynsha, basty mindet – jekelegen máselelerge jaýap berýden erejeler men retteý deńgeıindegi sheshimderge kóshý.
Is-sharada Qazaqstannyń qaıtalama shıkizatty qaıta óńdeýshiler qaýymdastyǵynyń tóraǵasy Batyrbek Áýbákirov, «Petrocouncil» Qazaqstannyń munaı-gaz Keńesi» qaýymdastyǵynyń teń tóraǵasy Serik Amanǵalıev, «Alprıma» JShS bas dırektory Andreı Degýnkov, «Qazaqstan ınvestorlar odaǵy» qaýymdastyǵynyń basqarma tóraǵasy Rýstam Júrsinov jáne ózge de azamattar sóz sóıledi.
Kezdesý sońynda iri bıznes pen ShOB ókilderi partııa qataryna qabyldandy. Osylaısha, Saýda jelileri odaǵy basqarma tóraǵasynyń orynbasary Elbegı Abdıev, Qazaqstan salyq keńesshileri qaýymdastyǵynyń múshesi Aıjan Balakeshova, «Integra Construction KZ» JShS aksıoneri Mútálip Shahmurat «Amanat» partııasynyń múshesi boldy. Sondaı-aq Qazaqstan IT-kompanııalary qaýymdastyǵynyń prezıdenti, Úılestirý keńesiniń múshesi Aıymgúl Ábileva, «Energy Monitor» qoǵamdyq qorynyń atqarýshy dırektory Nurlan Jumaǵulov, «Atameken» UKP óńdeýshi ónerkásip komıtetiniń tóraǵasy Qanat Ibraev, «FarmMedIndýstrııa Qazaqstan» qaýymdastyǵynyń prezıdenti Rýslan Sultanov, «Qazaqstan elektrenergetıkasy assosıasııasy» basqarma tóraǵasy Talǵat Temirhanov partııa qataryna qosyldy.
Kezdesý qorytyndysynda Memleket basshysynyń Alǵyshattary men partııalyq nagradalary el damýyna qosqan úlesi úshin partııa janyndaǵy Úılestirý keńesiniń músheleri men bıznes-qoǵamdastyq ókilderine saltanatty túrde tapsyryldy.