Sýretpen qatar qoıylǵan tólqujat ta – túpnusqa. NKVD-da saqtalyp, 80-jyldardan keıin Ishki ister departamentine ótkizilgen pasporttyń muqabasynda Keńes ókimetiniń eltańbasy jáne alty tilde jazylǵan pasport degen jazý bar. Kelesi betinde pasporttyń 1941 jyldyń 11 shildesine deıin jaramdy ekeni, aqynnyń aty-jóni (Djansýgýrov Ilıas), týǵan jyly (1894), týǵan jeri (aýl №4, Aqsý aýdany, Almaty oblysy), ulty (qazaq), áleýmettik jaǵdaıy (qyzmetker), turǵylyqty jeri (Alma-Ata) jaıly oryssha maǵlumat berilgen. Áskerge mindetti emes ekeni jaıly da jazylǵan. AE№503124 nómirli tólqujat. Bir qyzyǵy, pasporttyń 3-shi betinde pasport ıesiniń otbasy týraly da málimet berilgen. Úlken uly Azat, qyzdary Úmit pen Ilfa týǵan jyldarymen jazylǵan. Aqynnyń jubaıy jáne uly Saıat týraly málimet joq. Mýzeı qyzmetkerleriniń aıtýynsha, sebebi, áli anyqtalmaǵan. Eń sońǵy bette Ilııastyń turǵylyqty jeri týraly tolyq málimet berilgen. Tólqujat 31 betten turady. 1936 jyly 11 shilde kúni berilgen. Ol kezdiń zańy boıynsha bes jylda bir aýystyryp turatyn qujatyn jańalaýǵa úlgermepti. Úlgertpepti. Aqynnyń sońǵy ustaǵan qujaty retinde bul pasporttyń mańyzy zor. Ilııastyń qolynyń taby qalǵan, jan qaltasynan tastamaı júrgen jeke basyn kýálandyratyn qujat arpalysty ǵumyrdyń sońǵy yshqynysy sııaqty áser etedi. Qujattyń qaptalynda at aryp – týlaq, er aryp – arýaq bolǵan surqaı jyldardyń bir esteligindeı bolyp qatty azaptalǵan aqynnyń aqtyq sýreti qarap tur...
Almas NÚSIP, «Egemen Qazaqstan»
Almaty oblysy