Monografııalyq eńbekterde qazaq zııalylarynyń shyǵarmashylyq muralaryn zerdeleý jáne ony búgingi kúnmen baılanystyra otyryp, jandandyrý máseleleri qarastyrylǵan.
Atap aıtqanda, «Alash jáne ult ádebıeti» oqý-ádistemelik quralynda XX ǵasyrdyń basyndaǵy qazaq ádebıetiniń tarıhy men damý úrdisindegi ózindik erekshelikteri, sol kezeńdegi túrli ádebı baǵyttaǵy aqyn-jazýshylardyń ómiri men shyǵarmashylyǵy jan-jaqty saralanǵan.
Sonymen qatar, oqý quralynda stýdentterdiń bilimin tereńdetýge arnalǵan test tapsyrmalary usynylǵan. Kitap joǵary oqý oryndaryndaǵy «XX ǵasyr basyndaǵy qazaq ádebıeti» páni men jalpy orta mektepterdiń joǵary synyptarynda júrgiziletin «Alashtaný» kýrsyn oqytýda qoldanylady.
Ǵylymı eńbek avtorlary – pedagogıka ǵylymdarynyń doktory, professor Tursynaı Ábdiqadyrova men ǵylym magıstri Edilbek Ábdimomynov.
Al, qazaqtyń dańqty perzentteriniń ulttyq til mádenıeti men oılaý júıesine, etnopedagogıka salasyn qalyptastyrýǵa jáne ádebıet pen mádenıet salalaryna qosqan úlesteri «Alash jáne ult qaıratkerleri» monografııasynda keńinen qamtylǵan.
Kitap avtorlarynyń aıtýynsha, ǵylymı eńbekte Táýelsizdik, halyqtar birligi sııaqty qundylyqtar ótken ǵasyrdyń basyndaǵy qazaq zııalylarynyń eńbekterindegi oramdy oılarmen baılanystyryla otyryp zerdelengen.
Sondaı-aq, bolashaq urpaqty ımandylyqqa, adamgershilikke, otansúıgishtikke tárbıeleýdegi Alashtyń arda azamattarynyń paıymdy pikirleriniń túıinderi saralanǵan.
– Táýelsizdik qoǵamdyq ómirge, áleýmettik salalar men mádenı-rýhanı arnalarǵa kóptegen ózgerister ákeldi. Jańashyl baǵyttar men irgeli izdenisterge múmkindik berildi. Ult tarıhyn tanyp-tarazylaýǵa, tanymal tulǵalardyń kezeńi men qyzmetin, ómiri men shyǵarmashylyq muralaryn zerttep-zerdeleýge jańa kókjıekter ashyldy. Biz tól tarıhymyzdy tolyqqandy tanyp bilýimiz úshin eń aldymen, qazaqtan shyqqan belgili tulǵalardyń eńbekterin kópshilikke keńinen nasıhattaýymyz qajet. Bul ǵylymı eńbekter Alash ardaqtylarynyń qarymdy qyzmeti men muralaryn tanytýǵa súbeli úles qosatyn dúnıeler, – dep atap ótti Taraz memlekettik pedagogıkalyq ınstıtýtynyń Aqparattyq-ımıdjdik qyzmetiniń jetekshisi Jandar Asan.