Eki eldiń prezıdentteri Fınlıandııanyń ulttyq pavılonyndaǵy ekspozısııalarmen tanysyp, «Nur Álem» kesheninde ornalasqan Qazaqstannyń kórme pavılonyn aralap kórdi.
Sondaı-aq, memleketter basshylary kórme kesheniniń Kongress-ortalyǵynda ekijaqty kelissóz júrgizdi.
Nursultan Nazarbaev S.Nıınıstıoge elimizge saparmen kelip, Fınlıandııa pavılonyn ashýǵa qatysqany úshin alǵys aıtyp, eki el arasyndaǵy qarym-qatynastyń joǵary deńgeıde ekenin atap ótti.
– Bizdiń qarym-qatynasymyz – úlgi etýge turarlyq. Biz birneshe ret túrli álemdik basqosýlarda júzdestik. Fınlıandııa «EKSPO-2017» kórmesin ótkizý ornyn tańdap, sondaı-aq BUU Qaýipsizdik keńesiniń turaqty emes múshesi mártebesin alý kezinde bizge qoldaý bildirdi. Qazaqstan da halyqaralyq arenada Fınlıandııany árdaıym qoldap keledi, – dedi Memleket basshysy.
Qazaqstan Prezıdenti ekijaqty baılanystardy damytýdyń mańyzdylyǵyna toqtalyp, ónerkásip, farmasevtıka, aqparattyq tehnologııalar, bilim jáne medısına sııaqty salalardaǵy qarym-qatynasty nyǵaıtýǵa múddeli ekenimizdi aıtty.
S.Nıınıstıo Nursultan Nazarbaevqa kezdesýdiń uıymdastyrylǵany úshin rızashylyq bildirip, Qazaqstannyń jahandyq jáne óńirlik ózekti máselelerdi sheshýdegi róline toqtaldy.
– Sizdiń ekijaqty qarym-qatynas máselelerine ǵana emes, sonymen birge jahandyq problemalarǵa qatysty pikirińiz de men úshin árdaıym mańyzdy. Qazir búkil álem Qazaqstanda ótip jatqan kelissózderge kóz tigip otyr. Bul – Astanadaǵy Sırııaǵa qatysty kelissózder, – dedi Fınlıandııa Prezıdenti.
S.Nıınıstıo Memleket basshysyna ulttyq pavılonmen tanysqany úshin alǵys aıtyp, Fınlıandııaǵa saparmen kelýge shaqyrdy.