«Baýyrjan» qaıyrymdylyq qorynyń uıymdastyrýymen, Qazaqstan fýtbol federasııasy, «Nur Otan» partııasy jáne «Sesnabank» AQ-tyń qoldaýymen ótip jatqan fýtbol chempıonatynyń irikteý oıyndary elimizdiń 13 aımaǵynda 2017 jyldyń 25 sáýirinde bastaý alǵan bolatyn. Bıyl besinshi ret ótkeli otyrǵan atalmysh chempıonattyń irikteý kezeńinde respýblıkamyzdyń ár aımaǵynan fınaldyq joldamaǵa 26 komanda tartysqa túsip, balalar úıleri men mektep-ınternattarynan 11-14 jas aralyǵyndaǵy 250-den astam tárbıelenýshi qatysqan edi. «Baýyrjan» qaıyrymdylyq qorynyń ókili Aınur Sálimbaeva mundaı múmkindikter jas jetkinshekterdiń sportqa degen yntasyn, jarqyn bolashaqqa degen qulshynysyn oıata túsetinin aıtady: «Eýropanyń beldi fýtbol klýbyna barý ár dop qýǵan jankúıerdiń armany desek artyq emes. Al bizdiń balalar úıleriniń fýtbolshylary sondaı zor múmkindikke ıe bolýda. Jetkinshekter 2013 jyldan beri Eýropanyń áıgili fýtbol klýbtaryna baryp, Ronaldo, Messı, Roben, Havı, Torres, Grızmann syndy ataqty teńbil dop sheberlerimen kezdesip qaıtty». «Komandamyz bul chempıonatqa tórtinshi jyl qatarynan qatysyp kelemiz. Bıyl alǵash ret fınalǵa óttik. Barlyq qatysýshylarǵa sáttilik, ózimizge jeńis tileımin», – dep aǵynan jarylǵan Taldyqorǵan qalasyndaǵy balalar úıiniń «Aınalaıyn» komandasynyń oıynshysy Temirlan Nııazbaev jetim balalar arasynan fýtbol daryndaryn taýyp, qazaqstandyq fýtbol deńgeıiniń artýyna úles qosýdy maqsat tutqan chempıonat demeýshilerine alǵysyn bildirdi. 2014 jyly Almaty oblystyq №1 balalar úıiniń «Barys» komandasy Mılan qalasyna joldama alyp, «Mılanello» bazasyn tamashalady, al 2015 jyly Qaraǵandy qalasynyń «Tańsholpan» balalar úıiniń tárbıelenýshileri chempıonatta ozyp shyǵyp, áıgili Mıýnhen qalasyndaǵy (Germanııa) ALLIANZ ARENA ortalyǵynda bolǵan áıgili «Bavarııa» men «Real Madrıd» fýtbol klýbtarynyń oıynyn kórip qaıtqan edi.
Mıra BAIBEK, «Egemen Qazaqstan»
ALMATY