Salaýatty ómir saltyn nasıhattaýdy maqsat etken bul shara bir kúnge sozyldy. Aldymen márege jetken bılıard. Birinshi oryndy oblystyq «Jetisý» arnasy alsa, ekinshi oryn – Qarasaı aýdandyq «Zaman jarshysy» gazetiniń tilshisine buıyrdy. Voleıboldan qyzdar arasynda ótken jarysta Talǵar aýdandyq «Talǵar» gazeti top jardy. Ekinshi oryndy «Jetisý» telearnasynyń qyzdary, úshinshi júldeni Raıymbek aýdandyq «Hantáńiri» gazeti ıelendi. Arqan tartý boıynsha oblystyq «Jetisý» gazeti qarsylas shydatqan joq. Odan keıingi tizimde Uıǵyr aýdany men Kóksý aýdanynyń quramalary. Ústel tennısinen ótken jarysta da «Jetisý» gazeti top jardy. Qalǵan eki júlde Qarasaı aýdanynyń jýrnalısterine buıyrdy.
Saıystyń kórkin qyzdyrǵan basty sport – fýtbol boldy deýge bolady. Ádettegideı kishi fýtbol emes, oıyndy úlken alańda ótkizýdi maqul kórgen uıymdastyrýshylar shaǵyn ujymdardyń qosylyp, bir komanda shyǵarýyna múmkindik berdi. Bul da – joǵaryda aıtqan áriptestik syılastyqty arttyrýdyń bir joly eken destik. Fýtbolshylarǵa aýa raıy da qaraılasqandaı, tas tóbede shaqyraıyp turǵan kún tús aýa bultqa kirip, jýasyp sala berdi. Kún de kúıdirmegen, jańbyr da jaýmaǵan qońyr salqyn alańda ótken dop dodasynyń bas kýbogyn «Jetisý» telearnasy jeńip aldy. Al, «Jetisý» gazetiniń jigitteri kúmis, «Talǵar» gazetiniń oıynshylary qoladan medal taqty. Oblystyq Ishki saıasat basqarmasynyń tóraǵasy Rýstam Alpysbaevtyń aıtýynsha, BAQ ókilderi men Ishki saıasat arasyndaǵy túsinistik, aýyzbirlik ólkeniń ósip-órkendeýine zor yqpal etedi. Sol sebepti, jýrnalıster merekesine oraı ótken saıysqa uıymdastyrýshylar tarapy da arnaıy komanda shyǵardy.
Almas NÚSIP,
«Egemen Qazaqstan»
Almaty oblysy