El erteńi óskeleń urpaqpen baılanysty ekendigin eskergen «Nur Otan» partııasy men Dúnıejúzi qazaqtarynyń qaýymdastyǵy Qazaq jastarynyń birinshi halyqaralyq forýmyn uıymdastyrýǵa muryndyq boldy. «Rýhanı jańǵyrý jáne jastar» taqyrybyn talqylaǵan baıypty basqosýǵa álemniń 20-dan astam elinen kelgen qandastarymyz qatysty.
Atalmysh forýmdy ashqan «Nur Otan» partııasy Tóraǵasynyń birinshi orynbasary Muhtar Qul-Muhammed Aqordaly Astanada mándi májilis qurýshy qara kóz jetkinshekterdiń jeteli sóz qozǵaýlaryna tilektestik bildirdi. Taǵdyrdyń jazýymen shartarapqa tarydaı shashyrap ketken halqymyzdyń tarıhtyń talaı taýqymetin tartyp, tek táýelsizdik tusynda ǵana atajurtta qushaq aıqastyrýǵa múmkindik týǵanyn alǵa tartty. «Birikken Ulttar Uıymy dúnıe júzindegi 193 memlekettiń basyn qosady. Solardyń ishinde kezinde búkil álemdi otarlyq bóliske salyp, jer jahanǵa taraǵan aǵylshyn, ıspan, fransýz, portýgal, nemis jáne orys sııaqty alpaýyt halyqtar bar. Biraq, osy elderdiń eshqaısysy arnaıy baǵdarlama jasap, qandastaryn shetelden shaqyryp jatqan joq. Bizben taǵdyrlas Ortalyq Azııa elderinde de mundaı úrdis kezdespeıdi. Tek Qazaqstan ǵana táýelsizdik jyldary syrttaǵy 1 mıllıonǵa jýyq qandastarymyzdy atamekenge aldyrdy. Bul qazaqtyń baqyty úshin týǵan Elbasymyzdyń óz halqy aldynda sińirgen eren eńbegi. Osyny árbir qazaq eshqashan umytpaýy kerek», dedi ol salmaqty sózin sabaqtap.
Sondaı-aq, partııa Tóraǵasynyń birinshi orynbasary parasatty Prezıdentimiz Nursultan Nazarbaevtyń arqasynda qazaq jastarynyń qazirgi zamanǵa saı sapaly bilim alýlaryna barlyq jaǵdaı jasalǵanyna aıryqsha nazar aýdardy. Sonyń aıǵaǵy retinde Elbasynyń «Bolashaqqa baǵdar: rýhanı jańǵyrý» atty maqalasyndaǵy mańyzdy mindetterdi tiline tıek ete sóıledi. Mundaǵy basty maqsat – elimizde ǵylym-bilimdi damytý arqyly qazaq jastaryn álemdik órkenıettiń aldyńǵy shebine shyǵarý ekendigi atap kórsetildi. Keshegi Quryltaıda Elbasy shetelderden kelip oqıtyn qazaq jastaryna bólinetin kvotanyń eki esege kóbeıetini týraly nusqaý bergenine de erekshe ekpin túsirildi.
Aralasyp-quralaspasa jaqynyńnyń jatqa aınalatynyn aıtqan Muhtar Abraruly alystaǵy baýyrlar bir-birin tanyp júrýi quba-qup bolatynyn, sondyqtan jahandaǵy jalǵyz Otanymyzdy súıý qajettigine toqtaldy. Onyń oıynsha, patrıotızm degenimiz – qazaq, Qazaqstan degen qasıetti uǵymdardy júregińniń tórinde ustaý.
О́z kezeginde Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov te paıymdy pikir bildirip, Qazaqstandy mereıli memleketter qataryna qosýdaǵy Elbasynyń eren isteri týraly áńgimesin naqty mysaldarmen naqyshtady. Jınalǵandardy Otanymyzdy odan ári órkendeýge úles qosýǵa úndedi.
Jaryssózde jalyndap sóz sóılegen jastarymyz aǵa býyn artqan senimge laıyq serpin tanytty. Olardyń júrek túkpirindegi otanshyldyq, ultjandylyq sezimderi oı oramdarynan aıqyn ańǵarylyp turdy.
Gúlmıra ASYLBEKOVA, Shvesııadaǵy «Abaı» ortalyǵynyń jetekshisi»:
− Quryltaıǵa qatysý barysynda kóptegen baýyrlarymmen jaqynyraq tanystym. EKSPO-ny tamashalaýǵa múmkindik týǵyzǵandaryńyzǵa myń alǵys. Qazaqstan pavılonyna baryp, eldiń shırek ǵasyrda ǵalamat nátıjelerge qol jetkizgenine kýá boldym. Eńseli elordanyń kórki qandaı, shirkin! О́z basym Astanany Qazaqstan jetistikteriniń bıik shyńy dep baǵalaımyn.
Ǵalymbek ORALHANULY, Qytaı-qazaq stýdentter qoǵamdyq birlestiginiń tóraǵasy:
− Azııanyń kindik tósindegi uly dalanyń ulan-ǵaıyr jerin alyp jatqan Qazaq eliniń arý Astanasynda el mereıin asyrǵan EKSPO-2017 kórmesi kezinde ózderińizben kezdeskenime óte qýanyshtymyn. Qazaqstan men Qytaı arasyndaǵy dostyq qarym-qatynas jastarǵa jańa múmkindikter ashýda. Men Qytaıda tursam da, Qazaqstandaǵy ózgeristerge árdaıym kóz júgirtip otyramyn. Uly Jibek jolyn jańǵyrtý boıynsha eki el arasynda kóptegen jobalar júzege asyrylýda. Prezıdent Nursultan Nazarbaevtyń maqalasynda kóterilgen latynshaǵa kóshý bastamasy kóregendikpen qabyldanǵan kósheli sheshim. Bul − barsha qazaqty tutastyratyn altyn kópir.
Kárim Ilııas, taekvondadan Túrkııanyń chempıony:
− Nursultan Nazarbaevtyń «Bolashaqqa baǵdar:rýhanı jańǵyrý» atty maqalasy búkil túrki dúnıesin eleń etkizdi. Sebebi, bul shetel qazaqtarynyń kópten kútken jańalyǵy. Qazaqstan álipbıdi ózgertý kezinde Túrkııanyń tájirıbesin tıimdi paıdalanyp, onyń artyqshylyǵy men kemshiligin salystyryp, túrki elderi ishindegi eń myqty latyn álipbıin jasaýyna bolady. Men Ystanbuldaǵy Atatúrik aeroportynan ushyp kelip edim, endi qaıtarda Astanadaǵy Nursultan Nazarbaev halyqaralyq áýejaıynan attanatynyma qýanyshtymyn.
Jánibek ERQANAT, Mońǵolııadaǵy «Aqıyq» týrıstik fırmasynyń bas dırektory:
Qazaqstannyń árbir qadamyna tilekshimiz. Elbasy maqalasy jigerimizdi janyp, ulttyq namysymyzdy oıatty. El mártebesi óse bersin!
Dınara Moldaǵalıeva, bıofızık ǵalym, «Nur Otan» uıymdastyrǵan «Nurintech» jobasynyń jeńimpazy:
− Myna ǵasyrda asa bilimdi adamdar ǵana tabystyń taı qazanyn tasytady. Talantty zamandastarymyzdy qoldaýda partııa qyrýar is tyndyrdy. Solardyń biri − «Nurintech». Maqsaty – daryndylardy daralaý. Endigi jerde osy otyrǵan bárimiz Elbasy belgilegen mejelerdi eńserýge eńbektengenimiz durys.
Ermek HAPIZOV, Reseı halqy jastary assambleıasy Omby aımaqtyq bóliminiń basshysy:
− Keıingi ýaqytta ombylyq qazaq jastary Qazaqstanǵa qaraı aǵylýda. Tarıhı otanymyz tartady. Osynda baqytyn tapqan baýyrlarymyz barshylyq. Solarǵa eliktep-solyqtaımyz. Ombyda Shoqandaı uly ǵalymnyń, Maǵjandaı Alash arysynyń izderi qalǵanyn maqtan etemiz.
Ádil AHMETOV, «Daryn» memlekettik jastar syılyǵynyń laýreaty, kıno jáne teatr akteri:
Biz baqytty urpaqpyz. Egemen elimiz bar. Bilgenge bul baǵa jetpes baq. О́zim basty rólde oınaǵan «Anaǵa aparar jol» fılmi tarıhymyzdy tereńirek tanýyma septigin tıgizdi. Talaı kórermenniń kózinen jas taramdap aqqanyn kórdim. Tatarstanda bir kisi maǵan kelip: «Qazaqtar, sizder baqyttysyzdar. О́z tarıhtaryń jóninde kıno túsire alasyzdar», degende táýelsizdigimizge ishteı táýbe qyldym.
Forým sońynda jıynǵa qatysýshylar tarapynan qoıylǵan suraqtarǵa «Nur Otan» partııasy Tóraǵasynyń birinshi orynbasary Muhtar Qul-Muhammed jan-jaqty jaýap qaıtardy.
Talǵat BATYRHAN, «Egemen Qazaqstan»