Gazettiń mereıtoıyna arnalǵan shara qaladaǵy «Qaınar» bilim berý jáne bos ýaqytty qamtý kesheninde ótti. Qala ákimdigi, ishki saıasat bólimi gazettiń mereıtoıyna jaqsy daıyndyqpen kelipti. Ákimniń orynbasary Erlan Myrzabekov: «Otarqa» – Táýelsizdiktiń jarshysy. Ekibastuzdyqtardyń rýhyn oıatyp, rýhanı turǵydan baıytty. Amankeldi aǵamyz salǵan sara jolyn búgingi tilshiler, redaksııa ujymy jalǵastyrýda» degen jaqsy tilek aıtty. Oblystyq «Saryarqa samaly» gazetiniń redaktory Nurbol Jaıyqbaev áriptesterine shyǵarmashylyq shabyt tiledi. «Otarqa» gazetin Amankeldi aǵamyzdan keıin 2006 jyldan bastap 9 jyl basqarǵan jýrnalıst Jasserik Sádýaqasovty «Qala aldynda sińirgen eńbegi úshin» belgisimen marapattaldy.
– «Otarqa» men Amankeldi aǵa men úshin egiz uǵym. Aǵany qatty saǵynyp júrmiz, – dep aǵynan jaryldy Jasserik Sádýaqasov.
Sondaı-aq, gazettiń qazirgi redaktory Janargúl Qadyrova Halyqaralyq «Qazaq tili» qoǵamynyń «Qazaq tiliniń janashyry» tósbelgisine ıe boldy.
– «Otarqa» óz oqyrmandarymen birge Ekibastuzda Naýryz meıramynyń qaıta oralýyna, qazaq balabaqshalary men mektepteriniń kóbeıýine, qala kósheleriniń qazaqylanýyna úles qosty. Áli de rýhanı jańǵyrý salasynda birge qyzmet jasaımyz, – dedi Janargúl áriptesimiz.
Mereıtoıǵa arnalǵan saltanatty jıynda basylymnyń eń birinshi basshysy bolǵan Amankeldi Qańtarbaev aǵamyzdyń jary Máktaı apaı aıtqandaı, marqum áriptesimizdiń qazaq tilinde gazet ashý úshin barmaǵan jeri, ashpaǵan esigi qalmaǵan edi. Sonda da qaısar minezdi jýrnalıst alǵan betinen qaıtpaıdy.
Ol ýaqytta aýdandyq «Alǵa-Vpered» gazeti qazaq jáne orys tilderinde shyǵady. Maqalalar orys tilinde jazylyp, qazaq tiline aýdarylady. Aqyry, qolyna qalam alyp, О́zbekáli Jánibekov aǵamyzǵa hat jazady. Amankeldi aǵamyz negizin salǵan, Táýelsizdik tusaýyn kesken «Otarqa» 1992 jyldyń 1 qańtarynda osylaı ómirge keldi.
Gazettiń №1 sanynda Amangeldi Qańtarbaevtyń «Aǵaıynǵa arnaý sóz» degen maqalasy, jazýshy Qalmuqan Isabaevtyń «О́tkir bol, «Otarqa!» degen tilegi jarııalandy. Gazetke «Otarqa» degen erekshe ataýdy kómirli, dúbirli, basqan jeri kenge toly bolǵan soń ba, ekibastuzdyq ǵalym Serik Jaqsybaev aǵamyz usynsa kerek. Ken ıgerip, laýlaı janǵan óndiristi dalanyń rýhanı ómirine de ot bersin degen bolar. Sol-aq eken, qazaq gazetiniń jeke shańyraq kótergenin qoldap, aýyl-aýdandardan Qaınylqaıat Eńsebaeva, Raıa Nurova, Rýhııa Dálelova, Erkesh Musabaeva, Kúlanda Súırikbaeva syndy tilshiler jan-jaqtan ún qosty.
Qazirgi kúni óńirdegi rýhanı ómirdiń tynys-tirshiligine qalamymen qan júgirtip júrgen Jasserik Sádýaqas, Saıa Moldaıyp, Raýza Musabaeva, Anar Qabdolla, Ásem Júnis, Darııa Erǵazına, Gúlsana Medeýbaı, Janar Qadyrova, Aınur Meıramova syndy jýrnalıster aldyńǵy býynnyń mektebinen ótip, qabyrǵalaryn qataıtqan-dy. Basqa da áriptesterimizdiń barshasy basylymnyń bedelin bıiktetip, oqyrmanyn arttyrý úshin úlesterin qosyp keledi.
Shırek ǵasyrlyq belesti baǵyndyrǵan basylymnyń mereıtoıynda «Atamura» ortalyǵynyń, mýzyka mektebiniń ónerpazdary óner kórsetti. О́ńirdiń aýdan-qalalarynan jınalǵan jýrnalıster arasynda doıby, shahmat jáne toǵyzqumalaqtan jarystar ótkizildi. Tarıhı-ólketaný mýzeıinde «Ot qalanyń jylnamasy – «Otarqa» atty kórme ashyldy.
Farıda BYQAI, «Egemen Qazaqstan»
Pavlodar oblysy, Ekibastuz qalasy
Sýretterde: Marqum Amankeldi Qańtarbaev; búgingi redaksııa