Jarma aýdanynda ornalasqan Baqyrshyq taý-ken óndirý kásiporny BAQ ókilderine arnaıy press-týr uıymdastyryp, áleýmettik jáne óndiristik nysandaryn aralatyp, atqaryp jatqan jumystarymen tanystyrdy.
Qazirgi ýaqytta munda qurylys jumystary qarqyn alyp, ártúrli qýattylyqtaǵy, joǵary voltti jelilerden bastap óndiristik ǵımarattarǵa deıin, uzyn sany elýden astam nysandar salynyp jatyr. Karerde ken óndirý sharalary bıylǵy jyldyń ekinshi jarty jyldyǵynda, al jaqyn jyldary iske qosylatyn taý-ken baıytý kesheninde alǵashqy konsentratty óndirý 2018 jyldyń úshinshi toqsanynda bastalady dep josparlanyp otyr. Fabrıka tolyq qýatynda jumys isteýge 2019 jyly kóshedi.
Altyn óndirýshi «Polımetall» kompanııasy 2014 jyly Jarma aýdany aýmaǵyndaǵy Baqyrshyq ken ornyn satyp alǵandyǵyn jarııalaǵan-dy. Sol ýaqyttan beri kásiporyn bıznestiń áleýmettik jaýapkershiligi negizinde aýdan turǵyndaryna turaqty túrde qoldaý kórsetip keledi. 2014-2016 jyldar aralyǵynda ken orny oblys jáne Jarma aýdany ákimdiktermen jasalǵan memorandýmdar aıasynda áleýmettik salaǵa 1 mlrd 74 mıllıon teńgeden astam ınvestısııa salypty. Osy ýaqytqa deıin oblys, respýblıka bıýdjetine jáne bıýdjettik emes qorlarǵa 1,2 mlrd teńge kóleminde salyq tólepti.
Kásiporynnyń qolǵa alǵan eń aýqymdy áleýmettik jobalarynyń biri – Áýezov kentindegi 20 jylǵa jýyq qańyrap bos turǵan 180 orynǵa arnalǵan balabaqsha ǵımaratyn qaıta qalpyna keltirýi. Kompanııa bul maqsatqa 240 mıllıon teńge qarjy jumsap, 2016 jyldyń aıaǵynda tolyqtaı jóndeýden ótkizilgen, zaman talabyna saı jabdyqtalǵan «Aqqý» balabaqshasyn memleket qaramaǵyna bergen-di. Jýrnalısterge tárbıe oshaǵyn aralatyp kórsetken balabaqsha meńgerýshisiniń mindetin atqarýshy Nazken Bekturǵanova 1999 jyly osy nysan jabylyp qalǵan kezde birneshe áriptesterimen birge óziniń de jumyssyz qalǵanyn aıtady. «Qudaıǵa shúkir, 20 jyldan keıin burynǵy áriptesterimiz osy balabaqshada qaıtadan bas qosyp, eńbek etip jatqan jaıymyz bar. Munda balǵyndar úshin de, tárbıeshiler úshin de barlyq jaǵdaı jasalǵan. Ujymymyzda eńbek etetin jas mamandardyń qatary da az emes. Balabaqshanyń jumys isteı bastaǵanyna bar bolǵany 4 aı bolsa da, úlken qalalarda ótetin ártúrli semınarlarǵa qatysyp, biliktiligimizdi shyńdap jatyrmyz», deıdi ol. Ken orny Áýezov kentindegi emhana, mektep pen erkin kúreske arnalǵan sport zalyn kúrdeli jóndeýden ótkizýge de járdemdesipti. Kásiporyn jyl saıyn Áýezov kenti men Shalabaı aýylyndaǵy mektepterdi bitirgen túlekterge 4 grant bólip otyrady eken. Qazirgi ýaqytta elimizdiń ýnıversıtetterinde 23 stýdent bilim alyp jatqan kórinedi.
«Qazaqstan Prezıdenti Nursultan Nazarbaev «Bolashaqqa baǵdar: rýhanı jańǵyrý» atty maqalasynda bıznestiń áleýmettik jaýapkershiligine erekshe toqtalǵan edi. Biz bul jaýapkershilikti tolyq sezinemiz. Sońǵy úsh jylda Jarma aýdanynyń Áýezov, Shalabaı aýyldarynyń damýyna 1 mlrd 74 mln teńge qarjy ınvestısııalandy. Bizdiń kásiporyn munymen toqtap qalmaı, aldaǵy ýaqytta da qoldaý kórsete bermek. Sebebi, bul aýyldyń ǵana emes, keler urpaqtyń ósip-órkendeýine tartylǵan ınvestısııa dep túsinemiz», deıdi «Baqyrshyq taý-ken óndirý kásiporny» JShS bas dırektory Iýrıı Ovchınnıkov.
Bıylǵy aqpan aıynda kásiporyn basshylyǵy Jarma aýdanynyń ákimdigimen memorandýmǵa qol qoıyp, aýdannyń damýyna 30 mln teńge, oblys ákimdigimen jasalǵan kelisimshart aıasynda aımaqtyń ınfraqurylymyna 750 mln teńge qarjy bólipti. Ken orny bıznestiń áleýmettik jaýapkershiligi aıasynda bıyl aýdan ortalyǵyna aıtysker aqyn Qalıhan Altynbaevtyń eskertkishin ornatyp, respýblıkalyq aqyndar aıtysyn uıymdastyrýǵa qarjylaı qoldaý kórsetip, Áýezov kentindegi ambýlatorııanyń ekinshi qabatyn, ákimdiktiń akty zalyn jáne «Arman» klýbyn jóndeýden ótkizýdi josparlap otyr.
Azamat QASYM, «Egemen Qazaqstan»
Shyǵys Qazaqstan oblysy, Jarma aýdany