«...táýirimin» Bir kúni kedeılik týraly áńgime bolyp jatady da, jurttyń bári kedeı bolyp shyǵady. Qalekeń únsiz qalypty. Sonda bir dosy: «Sen nemene, kedeı emessiń be?» deıdi. Sonda Qalekeń: – Kedeıi kedeımin-aý, biraq senderge qaraǵanda sonyń táýirimin, – depti. «...qaıta salyp qoıady» Jigitter bir azamatty maqtap jatady. Maqtaýy kelispeı jatsa kerek, bir kezde bireý: «Ol jylannyń aýzyndaǵy shópti alatyn jigit qoı» depti. Sonda Qalekeń: «О́ı, alǵanyń ne, ol ony qýyp jetip ustap alyp, aýzyna qaıta salyp qoıady» depti.
«Jaǵyń synsa da...» Bir dosy jol apatyna túsip jaǵy synyp, Qalekeńe kóńil suramadyń dep renjip júripti. Sodan Qalekeń qoly qalt etkende alystaǵy dosyna ushyp baryp, halin surapty. Dosy muny kórgen soń baıaǵy ókpesi qaıta esine túsip, «Jaǵym synyp jabyrqap jatqanda nege kelmediń?» dep taǵy da sol renishin aıta bastaıdy. Sonda Qalekeń: – Sen de qoımadyń ǵoı. Basyńnyń aman qalǵanyna táýbe deseıshi. Jaǵyń synsa da, saǵyń synbasyn, – depti. «Ultqa tóngen qaýip...» Qalekeńniń ústinen atynan at úrketin bir mekemege taǵy bireýler aryz túsiripti. Aryz túsken soń tekserilýi kerek. Qaıta-qaıta shaqyryp, ony-muny suraı beredi. Túsinikteme jazady. Aryzda «bes-alty adamǵa zańsyz páter berdi» deıdi. Onysy dáleldenbeıdi. Sodan taǵy bir kúni shaqyrǵanda shydamy taýsylǵan Qalekeń tergeýshige: – Baýyrym, qazaqtyń úısiz-kúısiz júrgen bes-alty balasyna páter bergennen Qazaqstannyń ulttyq qaýipsizdigine qaýip tónip tur ma? – depti. Sodan bul máselege núkte qoıylypty.
«...ishinde adasyp ketseń...» Bir aǵaıynnyń úsh-tórt qabat úıi bar eken. Qýysy, uńǵyl-shuńǵyly óte kóp, úıiniń ishine kirgenshe bes-alty bólmeden ótý kerek. Bir dosy sol kisiniń úıine qonaqqa bara jatqanyn maqtanysh etedi. – Sotkasyn bilýshi me ediń? – deıdi Qalekeń dosyna. – Joq, á, ony qaıtem, úıin bilem ǵoı, – deıdi. Sonda Qalekeń: – Úıiniń ishinde adasyp ketseń kerek bola ma degenim ǵoı, – depti.
Jıǵan-tergen Sársen QARMYS ALMATY