Jıynǵa qatysqan Qazaq kúresi federasııasynyń prezıdenti Arman Shoraev, QR Parlamenti Senatynyń depýtaty Darhan Qaletaev, «Qazaqstan» RTRK» AQ Basqarma tóraǵasy Erlan Qarın týrnırdiń jańalyqtarymen bólisip, atqarylǵan jumystar týraly baıandap berdi.
Osy jyldyń basty ózgerisi retinde jarystyń ótkiziletin ornyn aıta ketken jón. «Qazaqstan barysy» týrnıriniń fınaldyq kezeńi bıyldan bastap «Saryarqa» velotreginde emes, 2015 jyly salynǵan «Barys Arena» muz saraıynda ótedi. Arman Shoraevtyń aıtýynsha, jankúıerler «Barys Arenadan» boz kilemdegi básekeni jaqynnan tamashalaı alady eken.
«Saryarqa» velotregine eshqandaı ókpemiz joq. Qaı kezdi alyp qarasaq ta týrnır joǵary deńgeıde ótti. Al, «Barys Arenaǵa» bıyldan bastap aýysýymyzdyń basty sebebi – bul sport saraıy kúres sporty úshin óte tıimdi. Naqtyraq aıtqanda, jankúıerler úshin óte yńǵaıly», deıdi Arman Tólegenuly.
2017 jyldyń taǵy bir ózgerisi – fınaldyq básekede qyzmet etetin tóreshiler. Olar jańa erejege saı, aldyn ala 200 000 teńge jarna tóleý kerek.
«Bıylǵy týrnırge elimizdiń ár aımaǵynan 12 tóreshini shaqyrdyq. Odardyń tek altaýy ǵana «Qazaqstan Barysynyń» fınalynda tórelik etetin bolady. Eger tóreshilerimiz ádildik tanytyp, mindetin durys oryndaı alsa, týrnır sońynda ózderi tólegen jarna ústinen taǵy da qosymsha 350 000 teńge syıaqy alatyn bolady. Kerisinshe jaǵdaıda, tólengen jarna qaıtarylmaıdy jáne qosymsha shara da qoldanatyn bolamyz», dep málimdedi federasııanyń bas hatshy Sársen Quranbek.
Sonymen qatar, bolashaqta «Qazaqstan barysy» týrnıriniń irikteý kezeńi reıtıng arqyly ótkizilýi múmkin. «Sebebi, elimizdiń keı oblystarynda qazaq kúresi damyp kele jatsa, keı óńirlerdiń deńgeıi tómendep ketken. Al damymaǵan aımaqtardan jyl saıyn «Qazaqstan Barysyna» qatysqanymen, eshqandaı nátıje kórsetip jatqan joq. Sol úshin jaqsy nátıje kórsetip jatqan oblystyń balýandar sanyn kóbeıtý úshin óńirlerdiń reıtıngine qaraıtyn bolamyz», dep atap ótti A.Shoraev.
«Qazaqstan» RTRK» AQ Basqarma tóraǵasy Erlan Qarın «Qazaqstan barysy» týrnıriniń teletranslıasııasy Gennadıı Golovkınniń kóriliminen kóp bolmasa, odan kem emes deıdi. «Qazaqstan barysy» týrnırin Qazaqstan aýmaǵyndaǵy translıasııa reıtıngin Gennadıı Golovkınniń jekpe-jegimen salystyrýǵa bolady. Tipti, qaralym sany boıynsha asyp túsýi de múmkin», dedi.
«Qazaqstan barysy» týrnıriniń úsh dúrkin chempıony Beıbit Ystybaev bıyl jarysqa qatyspaıdy. Ol kúz mezgilinde ótetin «Álem barysyna» daıyndalýda. Sondyqtan, uıymdastyrýshylar bıylǵy týrnırde jańa esimniń shyǵatynyna senimdi.
Aldaǵy týrnırdiń júlde qory da qomaqty. Jeńimpaz atanǵan balýanǵa altyn belbeý jáne altynnan quıylǵan «Taıtuıaq» tabystalady. Ekinshi jáne úshinshi orynǵa kúmis jáne qola belbeý beriledi. Sonymen qatar, ár beldesýdegi jeńiske 100 myń teńge qarjylaı syıaqy taǵaıyndalǵan. Al, úshinshi oryn ıelengen balýanǵa bir mıllıon 800 myń, bapkerine 900 myń teńge. Ekinshi orynǵa bes mıllıon 500 myń, bapkerine bir mıllıon 800 myń. Birinshi oryn ıelengen balýanǵa 25 mıllıon, bapkerine úsh mıllıon 500 myń teńge tabystalady.
Eske sala keteıik, bıyl jetinshi márte ótkeli otyrǵan «Qazaqstan barysy» respýblıkalyq týrnıri 2 shilde kúni «Barys Arena» sport saraıynda Astana ýaqytymen saǵat 12:00-de bastalady. Ony «Qazaqstan» jáne «Qazsport» telearnalarynan bólek, reseılik «Match! Planeta», «Boes», «Boks TV» jáne Túrkııanyń «TRT Avaz» telearnalary tikeleı efırde kórsetedi.
Álı BITО́RE,
«Egemen Qazaqstan»