Otyrysty ashqan Memlekettik hatshy «Mereıli otbasy» ulttyq konkýrsy Qazaqstan Prezıdentiniń bastamasymen jyl saıyn ótkiziletinin aıtty.
Gúlshara Ábdiqalyqova Memleket basshysynyń «Bolashaqqa baǵdar: rýhanı jańǵyrtý» atty baǵdarlamalyq maqalasynyń negizgi erejeleriniń biri rýhanı qundylyqtardy saqtaý jáne jańǵyrtý bolyp sanalatyndyqtan, bıylǵy konkýrstyń mańyzy zor ekenin atap ótti. Adam boıynda rýhanı qundylyqtar qalyptastyrýda otbasy ınstıtýty mańyzdy ról atqarady.
Konkýrs neke jáne otbasy ınstıtýtyn, qoǵamdaǵy izgilik pen adamgershilikti nyǵaıtýǵa baǵyttalǵan. Ol bıyl tórtinshi ret ótkizilip otyr. Baıqaýǵa 2879 otbasy qatysty, 2016 jylmen salystyrǵanda olardyń sany 11,6% ósken (2016 jyly 2579 otbasy qatysqan). Bul rette qatysýshylardyń 36,2%-y (1041 otbasy) – kópbalaly otbasylar (2016 jyly 1065 otbasy bolǵan).
Sonymen qatar, byltyrmen salystyrǵanda bir mamandyqpen aınalysatyn áýletter ókilderinen quralǵan otbasylar sany 6,8%-ǵa (2016 jyly – 483, 2017 jyly – 516) jáne jas otbasylar sany 6%-ǵa ulǵaıdy (2016 jyly – 472, 2017 jyly – 500).
Mamyr aıynda barlyq oblystar men respýblıkalyq mańyzy bar qalalarda aımaqtyq kezeńniń sońǵy máresindegi jeńimpazdaryn saltanatty marapattaý is-sharalary ótkizilip, tórtinshi – ulttyq kezeńge qatysatyn 2 otbasy anyqtalǵan bolatyn.
Otyrysta ulttyq kezeńge qatysatyn 16 úmitker bekitildi.
«Mereıli otbasy» konkýrsynyń fınaldyq kezeńinde jeńimpazdy anyqtaýǵa elimizdiń barlyq azamattary SMS-habarlamalar jiberý jáne kaztube.kz saıty arqyly ınteraktıvti daýys berý ádisimen tikeleı atsalysa alady.
Daýys berý qorytyndysy qyrkúıektiń ekinshi jeksenbisinde – Otbasy kúni qarsańynda shyǵarylady.