Qazaqstandyq klýbtardan Eýrododa básekesin birinshi bolyp pavlodarlyq «Ertis» bastap berdi. Birinshi aınalymda bolgarııalyq «Dýnav» komandasyn óz alańynda qabyldaǵan kerekýlikter 1:0 esebimen jeńiske jetti. Oıyndaǵy jalǵyz goldyń avtory pavlodarlyq klýbqa jańadan aýysyp kelgen moldovalyq shabýylshy Igor Býgaev boldy. Qarymta kezdesý 6 shildede Bolgarııada ótedi.
Al, «Qaırat» klýyby óz alańynda «Atlantas» komandasyn qabyldap, qarsylastar qaqpasyna jaýapsyz alty gol soqty. Almatynyń Ortalyq stadıonynda ótken oıynnyń 21-shi mınýtynda Jerar Goý esep ashsa, araǵa bes mınýt salyp Andreı Arshavın penaltıden gol soǵyp, esepti eseleı tústi. 30-shy mınýtta alańǵa shyqqan Ivo Ilıchevıch, tablodaǵy kórsetkishti 3:0-ge jetkizdi. Birinshi taım aıaqtalar tusta Arshavın óziniń ekinshi golyn saldy. Ekinshi taımda Goý men Ilıchevıch taǵy bir-bir gol soǵyp, kezdesýdi qorytyndylady. Jalpy esep – 6:0. Aıta keteıik, qarymta oıyn 6 shildede Lıtvada ótedi.
Eýropa lıgasyna qatysyp jatqan úshinshi komandamyz ókinishke qaraı syrt alańda jeńilip qaldy. Bosnııanyń «Shırokıı Brıeg» komandasymen oınaǵan shymkenttik «Ordabasy» klýby 2:0 esebimen qarsylastaryna jol berip qoıdy. Birinshi taımnyń 37-shi mınýtynda qarsylas komandanyń fýtbolshysy Ivan Krstanovıch 11 metrlik aıyp soqqysyn sátti oryndasa, taım aıaqtalar tusta shabýylshy dýbl avtory atandy. «Ordabasy» men «Shırokıı Brıeg» arasyndaǵy qarymta kezdesý 6 shilde kúni Almatynyń ortalyq stadıonynda ótedi.