Jumadan senbige qaraǵan túni Italııanyń Mılan qalasynda ǵasyrlyq tarıhy bar, 77 myń kórermendi syıdyra alatyn áıgili «San-Sıro» stadıonynda XHV qysqy Olımpııa oıyndarynyń alaýy tutandy. Odan bólek, saltanatty shara Kortına-d’Ampesso, Lıvıno, Predasso qalalarynda da uıymdastyryldy. Teatrlandyrylǵan qoıylymdar, ásem ánder, quttyqtaý sózder aıtylǵannan keıin qatysýshy 93 memlekettiń sporttyq delegasııa músheleri sap túzedi. Rásimde elimizdiń kók baıraǵyn short-trekshi Denıs Nıkısha men frıstaılshy Aıaýlym Ámirenova ustap shyqty.
Ashylý saltanatynyń resmı bóliminde Halyqaralyq Olımpıada komıtetiniń (HOK) prezıdenti Kırstı Koventrıdiń quttyqtaý sózinen keıin Italııa prezıdenti Serdjo Mattarella 2026 jylǵy Olımpııa oıyndaryn ashyq dep jarııalady.
Dúbirli dodanyń alaýyn tutandyrý baqyty Italııanyń dańqty taý shańǵyshylaryna buıyrdy. Úsh dúrkin Olımpıada chempıony, eki dúrkin kúmis júldegeri, eki dúrkin álem chempıony Alberto Tomba Mılandaǵy Álem Araksynda, Olımpııa oıyndarynda úsh márte mereıi ústem bolǵan Debora Kompanonı Kortına-d’Ampessodaǵy Andjelo Dıbona alańynda osy tarıhı mıssııany júzege asyrdy. Tórtjyldyqtyń basty dodasynyń jeńimpazy Sofııa Godja da dál sondaı qurmetke bólendi.
Olımpıadanyń alǵashqy kúnderi sporttyń birneshe túrinen básekeler ótip, alǵashqy júlde jıyntyqtary sarapqa salyndy. Elimizdiń órenderi jarysty senbi kúni bastady. «Tezeroda» ótken shańǵyshylardyń sketlon saıysynda Ksenııa Shalygına – 53, Nadejda Stepashkına 60-oryndy qanaǵat tutty. Bas júldeni shvesııalyq Frıdo Karlson oljalasa, onyń otandasy Ebba Anderson kúmispen kúpteldi. Qola medal norvegııalyq Heıdı Venge buıyrdy.
Kóp keshikpeı konkıshiler boı kórsetti. 3 myń metrlik básekede ıtalııalyq Francheska Lollobrıdjıda Olımpıadanyń rekordyn jańartyp, altynnan alqa taqty. Norvegııalyq Ragne Vılklýnd pen kanadalyq Valerı Maltıas kúmis pen qolany qorjyndaryna saldy. Bizdiń Nadejda Morozova altynshy satyǵa taban tirese, Elızaveta Golýbeva úzdik ondyqty túıindedi. Osy oraıda alǵashqy altylyqqa engen sportshylarǵa memleket tarapynan beriletin syıaqynyń baryn esterińizge sala keteıik. Onyń quny – 5 myń dollar (2,47 mln teńge). Al jeńis tuǵyryna kóterilgen dúldúlder mynadaı kólemde syıaqy alady: altyn – 250 myń dollar (123,3 mln teńge), kúmis – 150 myń dollar (74 mln teńge), qola – 75 myń dollar (37 mln tenge). Tórtinshi, besinshi satyǵa jaıǵasqandar 30 myń (14,8 mln teńge) men 10 000 dollarǵa (4,9 mln teńge) ıelik etedi.
Jeksenbidegi taý shańǵyshylarynyń jarysynda Ámirǵalı Muratbekov – 45, Naıl Bashmakov – 49-satyǵa taban tiredi. Bul jarysta alǵashqy úsh oryndy Iohannes Klebo (Norvegııa), Matıs Deloj (Fransııa), Martın Nenget (Norvegııa) ıelendi.
Teńiz deńgeıinen 1 600 metr bıiktikte ornalasqan «Antgols» stadıonynda bıatlonshylar saıysqa tústi. Aralas estafetada Vladıslav Kıreev, Áset Dúısenov, Aısha Raqysheva, Mılana Geneva baq synap, 21-oryndy qanaǵat tutty.