Batys Qazaqstan oblysyn tórt jyl basqarǵan Baqtyqoja Izmuhambetovke bul óńirdiń máseleleri óte tanys. Depýtat oblystyń aýdan-aýyldaryndaǵy jaǵdaıdy jaqsy túsinip otyr:
– Elbasy saıasatymen júrgizilip otyrǵan memlekettik baǵdarlamalardyń arqasynda barlyq jerde oń ózgeris baıqalýda. Sonyń ishinde Batys Qazaqstan oblysynda da birneshe iri jobalar júzege asty. Buryn 12 aýdannyń teń jarymyna qatqyl tabandy jol joq edi, qazir jaǵdaı ájeptáýir jaqsarǵan. «Nurly jol», «Nurly jer» baǵdarlamalarynyń arqasynda ınfraqurylymdar odan ári damyp, turǵynúı qurylysy qaýyrt júrýde. Biz óńirde josparlanǵan jańa jobalar týraly habardarmyz, olardy qoldaýǵa ázirmiz, – dedi Baqtyqoja Salahatdınuly.
Oblys ákimi Altaı Kólginov depýtattarǵa aq jol tilep, turǵyndardyń áleýmettik jaǵdaıy men kommýnaldyq máselelerin jaqsartýǵa árdaıym nazar aýdaratyny úshin alǵys aıtty.
– Parlament depýtattarynyń óńirimizge kelip, bizdiń nysandarmen tanysýy – jergilikti máselelerdi sheshý úshin jasalǵan úlken demeý. Elbasy tapsyrmalary Aq Jaıyq óńirinde josparly túrde júzege asýda. «Nurly jol» baǵdarlamasy úshin qarajat bólindi, ásirese ınfraqurylymdy damytýǵa kóp kóńil bólinýde. Sonyń ishinde jol máselesin basty orynǵa shyǵaryp otyrmyz. Prezıdent tapsyrmasyna oraı bıyl oblysta 500 shaqyrym jol jóndeledi, onyń 200 shaqyrymy – respýblıkalyq mańyzy bar kúre joldar. Birqatar jobamyz kelesi jyly támamdalady. «Nurly jer» baǵdarlamasy úshin 12 mıllıard teńge bólindi, qazir jalpy sany 1600 páterlik kóp qabatty 11 úı salynýda. Buǵan qosa 8 aýdanda da turǵyn úı qurylysy júrip jatyr. Osynyń bári páter kezeginde turǵan jerlesterimizdiń baspana jaǵdaıyn sheship, óńirdiń ekonomıkasyn da kóterip jatyr. О́ıtkeni, úı quryly kombınattary, kirpish zaýyttary, temirbeton shyǵaratyn ónerkásip oryndary, jıhaz shyǵaratyn zaýyttar, polıetılen qubyrlar zaýyty tapsyrys alyp, qomaqty tabys taýyp jatyr, – dedi óńir basshysy Altaı Kólginov aımaqta atqarylyp jatqan jumystar jóninde.
Kezdesý kezinde oblysta sport ınfraqurylymyn damytý, kásipkerlikti qoldaý, taǵy basqa taqyryptar da kóterildi.
– Biz Batys Qazaqstan óńirinde 10 kún bolamyz. Turǵyndarmen, eńbek ujymdarymen kezdesemiz, kásiporyndardy aralap, qoǵamdyq uıymdar jumysymen tanysamyz. Zań shyǵarýshy depýtat bir óńirmen tuıyqtalyp qalýyna bolmaıdy, ol Qazaqstannyń barlyq qıyryndaǵy ahýalmen jaqsy tanys bolýy tıis. Oblys basshysymen júrekjardy áńgimelestik, óńir úshin ózekti máselelerge qanyqtyq. Májilistiń kelesi sessııasynda kóteriletin taqyryptar tizbegi osylaısha jasalady, – dep atap ótti depýtat Pavel Kazansev.
Osydan keıin Májilis depýtattary Baqtyqoja Izmuhambetov pen Abaı Tasbolatov oblys basshysymen birge Oraldaǵy tennıs ortalyǵy men oqýshylar jáne jastar saraıynda bolyp, atalǵan nysandardyń tynys-tirshiligimen tanysty.
Qazbek Quttymuratuly,
"Egemen Qazaqstan"
Sýretti túsirgen
Temirbolat Toqmámbetov