Qazir óńirde qurylysqa asa qajetti materıaldyń biri – shyny bolyp otyr. Osy oraıda «Aqtóbe» áleýmettik-kásipkerlik korporasııasynyń enshiles kompanııasy «Aqtóbe-shyny» JShS shyny shyǵarý zaýyty qurylysy ınvestısııalyq jobasyn qolǵa alǵanyn tek quptaý ǵana qajet. Osy nysandy turǵyzý úshin bıýdjetten 214,3 mıllıon teńge bólingen eken.
Áıtse de, bıýdjet qarajatyn tıimsiz paıdalaný saldarynan ınvestısııalyq jobanyń joly kesilgen. Árıne, bul arada «Aqtóbe» áleýmettik-kásipkerlik korporasııasynyń basy-qasynda júrgender barlyq is-qımyldy birinshi kezekte zaýyt qurylysyn júrgizýge jumyldyrýy kerek edi. Alaıda, olar ózderiniń tikeleı atqarýǵa tıisti mindetterine jaýapsyz, saldyr-salaq qaraǵan. Sóıtip, nysannyń irgetasyn kóterýdiń ornyna 143,9 mıllıon teńgege ábden eskirip, qaraýsyz qalǵan ǵımaratty satyp alypty. Sonyń saldarynan zaýyt qurylysy toqtap qaldy. Memleket aktıvteri tıimdi túrde paıdalanylmaýynyń kesirinen shyny shyǵarý men energııa saqtaǵysh paketterdi óndiriske qoıý isi qurdymǵa ketip tyndy. Aıtyp aıtpaı ne kerek, áıteýir korporasııa jetekshileri 73 mıllıon tengeni jarǵylyq kapıtaldaǵy úleske salýmen ǵana shektelgen. Buǵan da táýbe dersiz. Tutastaı alǵanda, «Aqtóbe» áleýmettik-kásipkerlik korporasııasyna qarasty «Azııa Agro Holdıngi», «Bazarlardy basqarý», «Batys Agro-2008», «Tabys qala» enshiles kásiporyndaryna ústeme aýdıttik baqylaýlar júrgizý nátıjesinde 648,8 mıllıon tengeniń aktıvteri men bıýdjet qarajattary tıimsiz paıdalanylǵany belgili boldy. Bul kórinistiń ózi óńirdegi ınvestısııalyq jobalardy iske asyrýǵa ájeptáýir nuqsan keltirdi.
– Sóıtip, aımaqtaǵy áleýmettik-ekonomıkalyq mańyzy óte joǵary nysandardyń biri belgilengen ýaqytta paıdalanýǵa berilmeı qaldy. Munyń ózi óńirdegi shyny óndirisi naryǵyn jolǵa qoıý jáne qosymsha jumys oryndaryn qurý jónindegi is-qımyl baǵdarlamasynyń oıdaǵydaı oryndalýyna keri áserin tıgizdi, – deıdi Aqtóbe oblysy boıynsha tekserý komıssııasynyń tóraǵasy Saǵat Eńsegenuly.
Iá, ınvestısııalyq jobanyń tusaýy kesildi dep kóterińki kóńil kúımen sóz saptaýdyń ornyna, joly kesildi, zaýyt qurylysy toqtap qaldy dep kúızele, qamyǵa jazýǵa májbúr bolyp otyrǵanymyz ókinishti-aq.
Temir QUSAIYN, «Egemen Qazaqstan»
AQTО́BE