Shildeniń 11-i kúni keshke qaraı Batys Qazaqstan oblysy Zelenov aýdany Darııan aýylynda burshaq aralas jańbyr jaýyp, sońy qadimgideı qarǵa ulasqan. Tabıǵattyń bul tosyn qubylysy jergilikti turǵyndardy ábigerge saldy. Aýyl kóshelerinde keıbir elektr jelileri úzilip, jeke aýladaǵy baý-baqsha búlingen.
- Abyroı bolǵanda adam men mal shyǵyny, jaraqat alǵandar joq, - deıdi Zelenov aýdanyndaǵy áriptesimiz, «Aýyl tynysy» gazetiniń redaktory Nurjan Dúzbatyrov. – Oblys basshysynyń shuǵyl tapsyrmasymen aýdan basshylary oqıǵa ornyna jedel jetip, tabıǵat qubylysynyń zardaptaryn qalpyna keltirý sharalaryn jasady. Elektr qýatyn berý qalpyna keltirildi. Qazir jeke adamdardyń aýlasyna jáne egis alqaptaryna zııan tıgen-tımegeni anyqtalýda.
Darııan – 1997 jyly taratylǵan Prıýral aýdanynyń ortalyǵy bolǵan, 5 myńnan asa turǵyny bar iri eldi meken. Bir qyzyǵy, Darııan aýylymen kórshiles jatqan basqa eldimekenderde naızaǵaı oınap, nóser jaýyn jaýǵanymen, qarǵa ulaspaǵan.
Qazbek QUTTYMURATULY
«Egemen Qazaqstan»
Sýret áleýmettik jelilerden alyndy